Footballer ropui Maradona a liam ve leh ta

Argentine Footballer, mi tam takin Footballer piang tawh zawng zawnga ropui ber leh thiam bera an ngaih, Diego Maradona chu nizan hmasa khan boralin kum 60 mi a ni.

Maradona hi tun thla tir khan a Thluak-a Thisen tling avangin zai a ni a, dam takin damdawi In chhuahsan mahse, vanduaithlak takin Heart attack avangin Argentina khawpui Buenos Aires-a a chenna In-ah a boral a ni.

Maradona hmingpum hi Diego Armando Maradona niin, kum 1960 October ni 30 khan Lanus, Buenos Aires, Argentina-ah a piang a, kum 1976 atang kha Professional Football khawvel a luhchilh tan a ni.

Maradona hian 1986 FIFA World Cup-ah khan Argentina chu a Captain-na hnuaiah a champion pui a, Quarter Final inkhelah England laka a kut-a goal a khung chu larpui hle in, kha goal kha ‘Hand of God’ tia sawi zui niin he inkhel-ah goal dang a khung chu ‘FIFA Goal of the Century’ atan thlan a ni bawk. Ft. 5.5-a sang Maradona hian Argentina tan game 91 a khel hman a, goal 34 khung hman bawkin, World Cup vawi li-ah a ram tan hian a inlan a, 1990 World Cup khan Argentine hi Final a thlenpui leh bawk a, West Germany lakah an tlawm thung a ni.

Maradona hian kum 1976-ah Argentinos Juniors tan khelin kum 1981-ah Boca Juniors a pan leh a, kum khat chauh a awm hman tihin kum 1982-ah Barcelona a pan leh nghal a, kum 1984-an Italian Club Napoli pan lehin hei hi a vanglai tih theih a ni a, Napoli hi Serie A Title pahnih lakpuiin, kum 1991 khan Napoli-a a khelh laiin Cocaine test a positive avangin Football-a inhnamhnawih thei lo turin thla 15 chhung hrem a ni.

Kum 1992-ah Spanish club Sevilla pan lehin a hma a phak thei tawhlo a, kum 1993-ah Argentina Club Newell's Old Boys panin kum 1995-1997 chhungin a lo khelh tawhna Boca Juniors-ah bawk a kir leh a, kum 1997 khan a kum 37-na birthday-ah inkhelh a chawlhsan thu a puang zui ta a ni.

Football khelh a chawlhsan hnuah Maradona hian Argentina National Team pawh a lo enkawl tawh a, kum 2008 atang khan Argentina hi enkawlin, kum 2010 World Cup zawh khan a chhuahsan a, kum 2011 khan United Arab Emirates lamah Al-Wasl chu enkawlin kum khat chauh a enkawl hnuah Argentine Club, Deportivo Riestra chu Asst. Manager in a enkawl leh a, kum 2017-ah UAE lamah kir lehin Fujairah a enkawl a, kum khat hnuah Mexican Club Dorados de Sinaloa enkawl lehin kum 2019-ah an ram Club, Gimnasia y Esgrima (Club de Gimnasia y Esgrima La Plata) chu enkawl lehin hei hi a boral thleng hian a enkawl a ni.

Mi tam takin Footballer ropui bera an ngaih Maradona hian chawimawina pawh chi hrang hrang a dawng tam viau a, heng zinga langsar zual zingah kum 2000 khan Pele nen ‘FIFA Player of the Century’ atana thlan niin kum 1986 World Cup-a England lama Goal a khung pakhat chu ‘FIFA Goal of the Century’ atan thlan a ni bawk a, Ballon d'Or chawi-mawina pawh tum khat lo dawng tawhn ‘South American Footballer of the Year’ atan tum hnih thlan a ni tawh bawk a ni.