Latest News

Meizu mi 6 man leh an ni

Serchhip District Anti-Tobacco Squad te chuan Inrinni zing khan Serchhip Bazar building leh a chhehvel bakah Taxi leh Auto Rickshaw Stand-ah te Squad Drive an nei leh a, heng hmun an tlawhna ah hian Sikret leh Vaihlo kaihhnawih khuahkhirhna Dan bawhchhia a puipunna leh vantlang hmun-a meizu mi 6 an man leh a, heng mite hi pawisa chawitir nghal an ni.

PTS-a inkhunghrang thi in COVID-19 hri ala kai

Thenzawl PTS-a inkhunghrang lai niminpiah a boralta chu a sample enfiah a nih hnuah COVID-19 hri a kai tih finfiah niin Mizoram-a COVID-19 hri kai nunna chan chu mi 6 an tling ta a ni.

Niminpiah chawhma dar 11:05-a Thenzawl PTS-a inkhunghrang lai boral, R. Hrangthanga, PTS-a IV Grade hi a boral hma ni-a COVID Care Centre (CCC) atanga chhuahtir a nih avang leh hetianga a boral tak mai avanga rinhlelhna a awm avangin niminpiah tlai khan a sample lak nawn sak leh niin nizan hmasa khan Serchhip District-a TrueNat Laboratory-ah a Sample hi enfiah a ni a, COVID-19 hri a la kai tih finfiah a ni. Heti hian Mizoram-a COVID-19 hri kai zingah nunna chan mi 6 an awm ta a ni.

Tarlan tawh angin kum 40-a upa, R. Hrangthanga hi Bihar inthlana duty kal an haw hlimah COVID-19 hri a kai tih hmuhchhuah niin enkawlna hmunah dah nghal a ni a. Pathianni khan Rapid Antigen Test hmanga enfiah a nih hnuah hri kai tawh lovin hemi ni hian CCC atangin chhuahtir a ni a, PTS-ah hian ni 7 chhung inkhung-hrang zui tura tih niin niminpiah chawhma dar 11:05 khan a inkhunghranna hmunah hian a boral zui ta a ni.

Hetihlai hian Mizoram sawrkar chuan R. Hrangthanga hi Zunthlum leh Thisen Sang nei nia hriat a nih bawk avangin a thihchhan dik tak uluk taka chhui chian mek zel a ni tih nimin tlai khan Twitter lamah an tarlang thung.

Comments

Chhiar Hlawhte