Kumin ah Sky Lantern khap tel a ni dawn

Home Minister, Lalchamliana hova nimin-a sawrkar mi pawimawh te thukhawm chuan kan hmaa hunpui lo thleng turah halpuah, halmawi, silai lem mu kap chhuak thei leh Sky Lantern khap nise an ti.

SAD Conference Hall-a he thutkhawm ah hian Home Minister chuan COVID-19 avangin kumin hi kumdang zawng aiin halpuah leh halmawi lam chi reng reng hal loh a pawimawh lehzual dawn tih sawiin, COVID-19 hian thawkna lama harsatna a thlen tel avangin boruak ti bawlhhlawh thei halpuah leh halmawi hal lo turin nasa lehzuala mipui inzirtir a tul thu a sawi bawk.

He thutkhawm a tel te hian kumdanga tih thin angin halpuah, halmawi leh silai lem mu kap chhuak thei chu khap ni se tiin Sky Lantern hian bengchheng leh khu siam lo mah se kangmei tichhuak thei thil a nih avangin kumin atang chuan Sky Lantern pawh khap nise an ti a ni. Hei bakah hian Krismas leh kumthar vuakvetah Police-ten Check Post siamin ngawrh taka beihpui thlak tum a ni a. Tlawmngai pawl YMA te bakah COVID-19 avanga din, Local Level Task Force-te nena thawhho dan ngaihtuah tha an ti a. State pawn atanga heng thilte hi lakluh a nih lohna turin uluk taka lirthei te endik an nih dawn bakah online-a chahluh tum te danna turin Courier Company te chu hetiang thil chah an awm a nih chuan Police-te hnenah hriattir (report) zel turin ngen nise an ti bawk. 

District tin DC te chu khapna thupek tichhuak turin hriattir an ni dawn a. COVID-19 in nasa taka min chenchilh tawh avangin he natna inkaidarh tur ven nan leh a vei mekte himna turin halpuah, halmawi leh thildang hal luih, lei, lakluh leh zawrh lakah mipuite inthiarfihlim turin Committee chuan mipuite a ngen bawk a ni.