SEDP hnuaia AH &ety Department hmalakna Pilot Project AH&Vety Minister in a hawng

Mizoram sawrkar Flagship Programme, Socio-Economic Development Policy (SEDP) hnuaia AH&Vety Department hmalakna bultan nan Pilot Project 2019-2020 chu nimin khan AH&Vety Minister, Dr. K. Beichhua chuan a hawng.

AH &Vety Polyclinic-a SEDP hnuaia Pilot Project 2019-2020 hawnna hunah hian AH&Vety Minister, Dr. K. Beichhua chuan Mizoram sawrkar flagship programme a hlawhtlin theih nan sawrkar chuan hma a la chho tih sawiin, Board leh Department ten theihtawpa hma la chhoin Mizoram sawrkar, AH&Vety hnuaia SEDP hmalakna tur chu COVID-19 hri leng karah hawn a ni thei ta chu lawmawm a tih thu a sawi bawk. AH&Vety Minister chuan Pilot Project-a tanpuina dawng turte chu a hmahruaitu an ni tih hre tur leh an hlawhchham a remchan dawnloh thu sawiin, he Pilot Project in a tum ber chu Zoram-in Sa-a a intodelh theih nan leh ram economy tihhmasawnnan a nih thu a sawi bawk.

AH&Vety Minister chuan sawrkarin hri leng vanga harsatna a tawk chung pawhin theih tawp chhuahin tan a lak thu leh an hmalakna hrang hrang tarlangin, Vety Dispensary 7 chu District Hospital-a hlankai a nih thu te, Rural Animal Health Centre 35 chu Dispensary-ah hlankai a nih thu te, District Veterinary Hospital 6 sak hna kalpui mek a nih thu leh, Vawk pul hri a luh loh nana Animal Check-Gate siam a nih thu te, Mobile Veterinary Unit 8 lei a nih bakah, Goat Breeding Farm leh Broiler Poultry Farm bakah Intensive Mithun Stud Farm-ah hmalak a nih thu te a sawi bawk.

SEDP Pilot Project-a beneficiary thlang turin District 8-ah DC te Chairman-na hnuaiah District SEDP Beneficiary Selection Board siam a ni a, DVO te Member Secretary niin Fishery leh Sericulture-a District Officer te chu Board Member an ni a. Department-in Infrastructure duh ang ala neih remchan loh avangin District thar 3 te chu a hmaa an awmna District-ah beh tir lailawk an ni a. Vawk vulh lamah - Piglet Multiplication Unit leh Piggery Fattening Unit kalpui tum a ni a, Ar vulh lamah - Broiler Farming leh Backyard Poultry (Rainbow Rooster) Farming kalpui a ni ang.

He hmalakna hnuaiah hian Mizoram pumah beneficiary 1020 awmin Aizawl District-ah 617, Lunglei District-ah 154, Siaha District-ah 90, Mamit District-ah 35, Kolasib District-ah 32, Champhai District-ah 43, Serchhip District-ah 29 leh Lawngtlai District-ah 20 te an ni a, SEDP Fund hi beneficiary te Bank Account-ah thun a ni anga. Beneficiary te hnenah installment hnih zela pek zawh vek tum a ni. SEDP tanpuina sum pekchhuah hmain DVO hriatpuinain intiamkamna ziah tir vek niin, an Trade thlan a zirin training pawh pek an ni dawn a ni.