PC Party in Shadow Cabinet kalphung an zirho

Nimin khan PC Party hruaitute chuan Aizawl-a an Office-ah ‘Shadow Cabinet’ kalphung zirhona an nei.

‘Shadow Cabinet’ kalphung zirhona hunah hian PC Party Sr. Vice President, Vanlalruata chuan Shadow Cabinet hi British-ho chîn chhuah a ni ber tih sawiin, ram changkangah an nei deuh zel niin a sawi a. Shadow Cabinet an kalpui dan berah chuan Opposition party sawrkar tum khan sawrkar kal dan zawng zawng hriat vek an tum tih sawiin, “Chutiang tur chuan sawrkar Department zawng zawngah mawhphurtu insiamin sawrkar ang maiin an lo function a. Sawrkar tihsual zeuh vawm tawk thei tura inring rengin, an chan Department kha chak zawka hma sawnpui theih dan tur an lo zir char char a. Sawrkar paihthlakna atana hmanraw tangkai lutukah hmangin an sawrkar veleha hma la tura inzir nan an hmang a. An Party tan a hlawk mai bakah mipui tan a hlâwk. An sawrkar a nih pawha Minister ni zui thei turte mawhphurhna an pe ber thin, tiin Shadow Cabinet-a awm te chu Official pawhin Minister an hlauh tlukin an hlauin an zah thin niin a sawi bawk.

PC Party Sr. Vice President chuan an Party pawhin Shadow Cabinet hi an din ve tawh tih sawiin, “Kan invuah dan atang hian kan sawrkar huna Minister tur ang zawngin kan la kal chiah lova. Chutih rual erawh chuan Minister ni thei tura inzir nana hman kan tum a ni. Kan chan Department te hi kan hneh hle chuan ram leh party tan a that mai piah lamah keimahni mimal tan a tha hle,” tiin Party dang pawhin din ve se an duhpui hle tih a sawi bawk.