Mizoram-ah COVID-19 hri kai 20 hmuh belh an ni

Niminpiah-a Mizoram-a Sample enfiah atangin COVID-19 hri kai mi 20 hmuhchhuah an ni a, Mizoram-ah tualchhung-a hri inkaichhawng an tlem chho zel niin a lang.

Niminpiah-a Mizoram-a hri kai hmuhchhuah te hi ZMC Laboratory-a Sample 299 enfiah atangin mi 10 te, TrueNat Laboratory-a Sample enfiah 234 atangin hri kai pakhat leh Rapid Antigen Test hmanga Sample enfiah 969 atangin hri kai mi 9 te an ni.

Niminpiah-a ZMC Laboratory atanga hri kai hmuhchhuah mi 10 zinga mi 2 te hi BSF Sipai niin State pawn atanga rawn lut an ni a, tunhnaia Bihar inthlanna a Duty zingah IR Police hri kai pakhat hmuh niin State pawn atanga rawn lut hri kai pakhat hmuh a ni bawk a, midang 6 te chu tunhnaia hri kai hmuhchhuah kawm hnaih atanga tualchhunga hri kaichhawng an ni. District hrang hranga TrueNat Laboratory atanga hri kai hmuhchhuah awmchhun hi Serchhip District-a hri kai hmuhchhuah niin Bhavya Company hnuaia thawk tura Bihar atanga rawn lut a ni thung.

Rapid Antigen Test hmanga hri kai hmuchhuah mi 9 zinga 6 te chu Lawngtlai District-a hri kai hmuhchhuah an ni bawk a, an vai hian tualchhung-a hri kai kawmhnaih atanga kaichhawng niin an zingah hian Border Roads Organisation (BRO) mi pakhat a tel bawk. Champhai District-a Zokhawthar-ah tualchhung-a hri inkaichhawng pahnih hmuh an ni bawk a, Aizawl-ah State pawn atanga rawn lut hri kai pakhat hmuh niin inkhunghranna hmuna awmlai a ni bawk.

Nimin khan Mizoram-ah hri kai mi 33 te chu enkawlna hmun atanga chhuahtir niin nimin tlai dar 5:00 thlenga Mizoram-a hri kai hmuh chu 3765 niin mi 3352 enkawl dam an ni tawh a, hri kai enkawllai 408 awmin hri kai zaa 89.03 te enkawl dam an ni tawh a ni.

India ramah hri kai thar an pung leh hret :

Darkar 24 kalta chhungin India ramah COVID-19 hri kai 44,489 hmuh thar leh an ni a, hemi chhung hian hri kai 36,367 enkawl dam an ni thung. Darkar 24 kalta chhung khan India ramah Sample 10,90,238 enfiah niin heng atang hian COVID-19 hri kai 44,489 hmu leh an ni a, heng te nen hian nimin thleng khan India ramah Sample 13,59,31,545 enfiah ni tawhin hri kai 92,66,705 hmuhchhuah an ni tawh a ni.

Darkar 24 kalta chhung khan India ramah hri kai 36,367 te enkawl dam leh niin tun thlengin hri kai 86,79,138 enkawl dam an ni tawh a, hei hi hri kai hmuhchhuah atangin zaa 93.66 an ni a, tunah hian hri kai enkawllai 4,52,344 awmin hei hi hri kai hmuhchhuah atangin zaa 4.88 a ni bawk. Darkar 24 kalta chhungin India rama hri kai zingah nunna chan 524 awm leh bawkin tun thlengin hri kai zingah nunna chan 1,35,223 an awm tawh a, hei hi hri kai hmuhchhuah atanga chhutin zaa 1.46 a ni bawk.