Zirtawpni-ah Speaker thutlukna puan a ni dawn

MLA a nihna atanga ZPM Legislature Party Group Leader, Lalduhoma ban tir tuma hekna chungchanga thutlukna chu tunkar tawp, Zirtawpni khian puan a ni dawn.

Assembly Speaker, Lalrinliana Sailo chuan nimin khan Chanchinbu mi thenkhat te hnenah Lalduhoma hek a nih chungchanga thutlukna Zirtawpni chawhma dar 11:00-ah puan a nih tur thu hi a sawi a, MNF MLA 12 te'n Constitution 10th Schedule Para 2(2) bawhchhiaa Lalduhoma an hekna chungchang chu uluk taka an zir thu sawiin, Lalduhoma leh amah hektute a huho-a a kawmnaa an thusawite pawh uluk taka an zir thu pawh a sawi bawk a. An rorelna chu a lai theih nan mithiam an rawn thu te, State dangte lo tih tawh dan te, Court-in hetiang chungchanga ro a lo rel tawh dante uluk taka an en thu sawiin, “Dan kan en a, kan zirchiang ngat ngat a ni ber,” a ti.

Hek tawktu Lalduhoma'n a chungchang chu Committee on Privileges kutah dah turin a ngen tih Assembly Speaker chuan chanchinbu mite hmaah hian a sawi a, “Committee on Privileges-ah hian Pu Duhoma hektute zing ami hi Chairman a ni a, midang te pawh Member an ni bawk a, a kuta dah hi a fuh dawn lo a, Pu Duhoma pawh a ngenna ang kalpui chi a nih loh thu te ka hrilh,” a ti bawk.

Tarlan tawh angin, MNF MLA 10-te chuan Lalduhoma'n Constitution 10th Schedule Para 2(2) a bawhchhia nia ngaiin September 21, 2020 khan MLA atanga bàntir tura ngenna/hêkna Speaker hnenah an thlen a; September 24-ah MNF MLA dang pahnih in an thehlut ve leh a ni.