Chanchin thar thenkhat :

NEP 2020 a himlo niin sawi

All India Professional Congress (AIPC) Mizoram Chapter chuan National Education Policy 2020 chu hnam hnufual zawkte tan a him lo tih an sawi. Inrinni khan Aizawl Press Club-ah chanchin-bumite kawmin AIPC Mizoram Chapter President, Dr. Henry Zodinliana Pachuau chuan, “National Education Policy 2020-ah hian School Level-ah tawng chi thum hman ngei ngei tura duan a nihna hian hnam hnufual zawk, Hindi tawng hmang lo tan harsatna lian tak a thlen dawn a ni,” a ti a. Three language policy hi hman anih chuan Hindi, English leh Mizo tawng-a lehkha zir a ngai tawh dawn nia sawiin, “Zirlai phai lama lehkha zir tur tan phei chuan Mizo zirtirtu awmlohnaah chuan mahni tawng ni lo Indian language dang an zir a ngai dawn a, harsatna nasa tak a thlen dawn a ni,” a ti.

Lawngtlai inkharkhip dawn

Tunhnaiah Lawngtlai District chhungah COVID-19 hri kai hmuhchhuah belh zel a nih avang leh mipui vantlang zinga hri darh zel tur ven nan leh Contact Tracing leh Testing te chak zawk leh felfai zawka kalpui a nih theih nan naktuk Dec. 1, 2020 atanga tunkar Inrinni thleng khian Lawngtlai khawpui (town) huamchhungah Partial lockdown kalpui a ni dawn a. Hetihlai hian tunkar Zirtawpni, Dec. 4, 2020 khian LADC inthlanna neih tur niin hei vang hian Vote thlak turte chuan anmahni Veng VLTF te ruahmanna siam angin vote an thlak dawn bawk a ni.

Hnahthial DC hovin tlawh

Hnahthial District Bawrhsap, Vanlalmawia hovin SP leh Medical Officer te chuan Inrinni khan an District chhunga Tarpho leh Aithur khua te an tlawh a, Aithur-ah hian Ni zung chakna hmanga an khaw chawmtu Tui pump-na tlawhin Ni zung chakna hmanga power 2.5 Megawatt siam chhuahna hmun tura ruahman VC ten ram an pek Tin 10 hmun te, Zirna In leh Health Sub-Centre te an tlawh a. Tarpho-ah hian FCS&CA Department Godown sakna tur an enfiah bawk.

YMA inthlan ruahmanna siam

Central YMA chuan thuchhuah siamin kum-thar atana Branch YMA hruaitu thlanna neih turah CEC Meeting in alo rel tawh angin sawrkar in hri leng laka himna tura SoP a siam bawhchhe lova, boruak en chunga inthlanna kalpui mai nise a ti a, Branch YMA te chu mahni huamchhung theuh ah a remchan anga bawhzui tura tih an ni.

NH. 54 kawng khuar hnawh

Keitum Branch YMA te chuan Inrinni khan hnatlang neiin an khua atanga Serchhip lama kalna NH. 54 kawngpui khuar zual an hnawh a, he hnatlang-ah hian mi 80 vel thawkin an khawchhuak Durtlang-a khawsa, Zoramthanga chuan JCB thawhin kawng lai leh kawngsir a khuar zual te chu an hnawh a ni.