COVID-19 Hri kai enkawl dam hnuah boral

Serchhip Nursing School CCC-a COVID-19 hri kai enkawl, Pathianni-a hri a kai tawhloh avanga chhuahtir pakhat, Thenzawl mi chu nimin khan a boral avangin nizan khan a Sample enfiah nawn leh tura tih a ni.

Thudawn danin tun thla ni 12-a Serchhip District atanga hri kai hmuhchhuah pakhat, Hrangthanga (40), Police Training School (PTS) Thenzawl-a IVth Grade hnathawk lai hi Bihar inthlanna a an duty zawh hnu tun thla ni 12 khan COVID-19 hri a kai tih hmuhchhuah niin hemi zan la la hian Nursing School CCC-ah dahluh nghal a ni a, niminpiah khan a Sample enfiah nawn sak a nih hnuah hri lakah fihlimin Pathianni khan PTS Thenzawl Quarantine Facility-a ni 7 chhung awm leh tura chhuahtir a ni a. Amah hi taksa chaklo a nih bawk avangin nimin chawhma dar 11:05 khan an inkhunghranna hmunah hian a boral zui ta a ni.

Hetianga CCC atanga chhuak hlim a boral avang hian fimkhur thu-ah a sample hi enfiah nawn tura lak niin nizan khan Serchhip-a TrueNat Laboratory-ah enfiah leh tura tih a ni a, a ruang vuiliam dan tur chungchangah pawh fimkhur thu-ah COVID-19 hri kai boral te sawngbawl dana lo buaipui phawt tura tih a ni bawk.