Hri kai thar 1, enkawl dam 1

Niminpiah-a Serchhip District-a Sample enfiah atangin COVID-19 hri kai mi pakhat hmuh a ni a, Serchhip District-a hri kai pakhat chu enkawl dam a nih hnuah nimin khan chhuahtir a ni bawk.

Niminpiah khan Serchhip District-a TrueNat Laboratory-ah Sample 54 enfiah niin heng atang hian hri kai pakhat hmuhchhuah a ni a, hri kai hmuhchhuah hi Bhavya Construction Pvt. Ltd. hnuaia thawk niin tun thla ni 17 khan Bihar State atanga Serchhip District rawn thleng a ni a, Boxing Hall-a khunghrang nghal niin hri a kai tih hmuhchhuah a nih rual hian Nursing School CCC-ah dahluh nghal a ni. Bhavya Construction Pvt. Ltd. hi Serchhip District chhunga kawng siam hna thawka awm mek an ni. Niminpiah vek khan Serchhip District-ah Rapid Antigen Test hmangin Sample 12 enfiah niin hri kai hmuh-chhuah erawh an awmlo thung.

Serchhip District-a hri kai enkawl mek zingah nimin khan mi pakhat chu enkawl dam niin Nursing School CCC atanga chhuahtir a ni a, he hri kai enkawl dam hi tunhnaia Bihar inthlanna a Duty-a kal zing ami, PTS-a awm niin tun thla ni 12 khan hri a kai tih hmuhchhuah a ni a, nimin a enfiah leh a nih hnuah hri kai tawh lovin chhuahtir a ni ta a ni.

Heti hian nimin thleng khan Serchhip District-a COVID-19 hri kai hmuhchhuah chu 153 an tling ta a, heng zinga mi 94 te chu enkawl dam niin tunah hian hri kai enkawllai 59 an la awm mek a, District dang atanga hri kai enkawl tur rawn dahluh te nen tun dinhmuna hri kai enkawllai erawh mi 63 an ni mek thung.