Duhoma’n hriatthiam har ti

Serchhip bialtu MLA, Lalduhoma chuan tun thlenga hri kai enkawlna hmun atanga chhuah tur te RT-PCR hmanga test an la ni lo leh Test Kit mamawh khawp sawrkar in ala pe theilo chu hriatthiam har a tih thu a sawi.

Nimin a Press Statement a siamah Lalduhoma MLA chuan PTS, Thenzawl atangin Bihar inthlanna a duty turin mi 61 an kal tih sawiin, tun thla ni 12-a an lo haw atangin vawi thum test an nih tawh thu leh test apiangin hri kai hmuh belh zel an nih thu a sawi a. “Heng mite hi an lo haw atangin fimkhur takin hmun ruk-ah khunghran an ni a. Test hi an neih khat bakah result nghah chhung a rei a, chumi chhung chuan hri vei la hmuhchhuah loh, vei si te nen hmun khatah an awmho avangin an inkaidarh ta chiam mai a ni,” a ti a. Test zung zung theih an nihloh chhan chu Test Kit indaihloh vang tih thawktu ten an sawi thu a sawi bawk.