Hri kai pung chho zel

Zirtawpni-a Sample enfiah atangin Serchhip District-ah COVID-19 hri kai mi 4 hmuh niin Inrinni-a Sample enfiah atangin hri kai hmuh an awmlo thung.

Zirtawpni khan Serchhip-a TrueNat Laboratory-ah Sample 72 enfiah niin heng atang hian COVID-19 hri kai mi pakhat hmuhchhuah a ni a, he hri kai hmuhchhuah hi tun thla ni 17-a Assam atanga Serchhip District-a rawn lut niin Prem Kram Company hnuaia thawk, sawrkar in inkhunghranna hmun a siama inkhunghrang lai a ni. Zirtawpni vek khan Serchhip District-ah Rapid Antigen Test hmangin Sample 75 enfiah niin hri kai mi 3 hmuhchhuah an ni bawk a, heng hri kai hmuhchhuah te hi BSF Sipai niin Bihar inthlanna a Duty, tun thla ni 13-a Serchhip District rawn thleng an ni a, an taksa ah hri kai lan-chhuahna awm an ni.

Inrinni khan Serchhip District-a TrueNat Laboratory-ah Sample enfiah awm lovin Rapid Antigen Test hmangin Sample 5 enfiah a ni a, hri kai hmuhchhuah erawh an awmlo thung a ni.

Inrinni khan Serchhip Nursing School CCC atangin COVID-19 hri kai mi 4 enkawl dam niin heng mite hi Bihar inthlanna a Duty a kal Police mi leh sa an ni a, nimin lamah hri kai enkawl dam an awm belh lo bawk a ni.

Heti hian nimin thleng khan Serchhip District-a COVID-19 hri kai hmuhchhuah chu mi 158 an tling ta a, heng zinga mi 99 te chu enkawl dam ni tawhin tunah hian hri kai enkawllai 59 an la awm mek a, District pawnlam atanga Ser-chhip District-a hri kai enkawl tur rawn dah te nen tun dinhmuna Serchhip District-a hri kai enkawllai mek chu mi 63 an ni thung.