Latest News

Lalduhoma’n Speaker thutlukna chu Dan hmanga rorelna ni lovin politics-a phuba lakna niin a sawi

Serchhip bial atanga MLA atana thlantlin, MLA atanga ban tak Lalduhoma chuan a chungchanga Assembly Speaker Lalrinliana Sailo thutlukna chu Dan hmanga rorelna ni lovin, politics-a phuba a nih thu sawiin, “Kan kal zel dan tur chu kan party hruaitute'n an rel ang,” a ti.

MLA atanga ban a nih hnu nimin-a thuthar thehdarhtute'n an kawmnaah Lalduhoma chuan MNF-te'n hnawk an tih thu sawiin, “Speaker ber thutlukna hi Dan hmanga rorelna a ni lova, politics-a phuba lakna a ni. Min thlang tlingtu mipui ten 'Min phatsan lo' an tih laiin, 'A thlang tlingtu mipuite a phatsan' tiin dawt hmangin min ban a ni. Speaker chungah lungawilohna ka nei lova, kan party mite pawh mawhpuh lo turin ka duh,” a ti a, party pressure zo loin Speaker chuan thudik a dinpui ngam loh thu a sawi bawk.

Lalduhoma chuan Assembly Speaker chu Security an pekbelh nia a hriat thu sawiin, “Speaker hi Security pek belh a ngai lo, engmah kan ti lo ang. Kalphung thar hmanga kal kan ni a, buaina leh tharum kan duh ve lo. Dam takin ka tuar. Min duhsaktute leh ZPM member zawng zawngte buaina siam lam ngaihtuah lova, rilru tawngtaina nena hmachhawn mai turin ka sawm. Mipui hnenah kan thlen ang a, mipui Court-in a rel mai tur a ni. MNF hi an thangkam-ah ngei an awk mek a, ZPM min campaign sak a ni,” a ti.

Speaker-in Independent a nih pawmah a puh thu sawiin Lalduhoma chuan, “Ziak leh tawngka in vawi khat mah Independent tak tak ka nih thu ka sawi lo. Val Upa Council-in ziak leh tawngka in ZPM-a rinawm turin min intiam tir a, min thlangtlingtu ZPM-ah Vawiin thlengin ka la awm a, ka awm zel dawn. ZPM candidate 38-te khan Symbol, Manifesto, Flag etc. inang hmangin candidate kan ni a, Independent tak takin hetiang hi an hmang ngai lo,” a ti a, Speaker bulah Independent a nih lohzia hlir a sawi zawk thu a sawi bawk.

Lalduhoma chuan Anti Defection Law chu mahni thlang tlingtu phatsana party dang zawm san te hremna dan a nih thu a sawi a. ZPM chu a tir atangin tangruala awmkhawm mai mai tum an nih loh thu sawiin, “Chutiang ni ila ECI-a registration hmuh a har teh lul nen kan party kan surrender phal lo ang. Kalphung thar mipui sorkar din tum vangin kan tangho a ni,” a ti.

Serchhip Bialtu MLA hlui chuan a bial mipuite a lainat thu sawiin, “Ka kut, ka ka leh ka kei ban a ni ve lova, Serchhip bial mipuite tan ka hmang zel dawn. Pathian leh bial mipuite zarah Serchhip bial hi kan enkawl ho leh ngei i beisei tlat ang u. Sechhip bial mipui tan ka ding zel ang,” a ti a. Thuthar thehdarhtute zawhna chhangin a kal zel dan tur chu an party hruaitute'n an ngaihtuah tur thu sawiin, “Court a kal chu a rei deuh dawn an ti dawn nge ka hre lo. Chutihrualin, kan Ukil te chuan Court-a kal hi an chak khawp mai. A reilo zawngin Serchhip bial mipuite Court-ah chinfel vat law law turin thutlukna an siam zawk dawn nge, ka la hre bik lo,” a ti bawk.

Comments

Popular News (Last 30 Days)