Hri kai pakhat hmuh belh

Niminpiah-a Serchhip District-a Sample enfiah 105 atangin COVID-19 hri kai mi pakhat hmuh leh a ni a, Serchhip District-a hri kai hmuhchhuah chu mi 154 an tling ta.

Niminpiah khan Serchhip District-a TrueNat Laboratory-ah Sample 82 enfiah niin Rapid Antigen Test hmangin Sample 23 enfiah a ni bawk a, heng Sample enfiah atang hian COVID-19 hri kai mi pakhat hmuh niin Rapid Antigen Test hmanga Sample enfiah atanga hri kai hi hmuhchhuah a ni a, he hri kai hi mipa kum 35 mi niin nimin, Nov. 26-a Bihar atanga Serchhip District-a rawn thleng niin Ser-chhip District chhunga NH. 54 laihzauh leh siamthat hna thawk mektu, Prem Kram Company hnuaia thawk a ni a, Chhingchhip a rawn thlen veleh a Sample enfiah nghal niin hri a kai tih hmuhchhuah a nih rual hian Nursing School CCC-a enkawl tura dah nghal a ni bawk.

Nimin khan Serchhip District-ah hri kai mi pakhat chu enkawl dam a ni ve leh bawk a, he hri kai enkawl dam hi tun thla ni 17-a hri kai hmuhchhuah kha niin Bhavya Construction Pvt. Ltd. hnuaia thawk tur a ni.

Heti hian nimin thleng khan Serchhip District-a COVID-19 hri kai hmuhchhuah chu mi 154 an tling ta a, heng zinga mi 95 te chu enkawl dam ni tawhin tunah hian hri kai enkawllai 59 an la awm mek a, District dang atanga hri kai enkawl tur an rawn dah nen tun thlenga Serchhip District-a hri kai enkawllai chu 63 an ni. Serchhip District-ah hian hri leng avanga mahni In lama inkhunghrang mi 57 leh sawrkar hmunhmaa inkhunghrang 161 an la awm mek a ni.