Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

'COVID-19 No Tolerance Drive' kalpui zel tur niin hunpui laiin Programme huaihawt khap a ni

Mizoram-a 'COVID-19 No Tolerance Drive' kalpui mek chu kumthar January 10 thleng kalpui chhunzawm a ni dawn a, hunpui laiin Sawrkar programme pawimawh bik tihloh mipui hip thei programme huawihawt khap a ni.

Hemi chungchanga nimin-a sawrkar thuchhuah chuan COVID-19 hrileng mek avangin dinhmun khirkhan takah kan awm mek thu leh Mizoram chhungah pawh hrikai mi 3,700 chuang kan awm tawh thu an tarlang a, 'COVID-19 No Tolerance Drive' kalpui a nih hnuah hri kai thar an tlahniam thu leh tualchhung atanga inkaichhawng kan pung zel thung tih tarlangin, hei vang hian inkhuahkhirhna kalpui chungchangah leh himna tura thupek zawm kawng ah inthlahdah a rem lo a ni tih chiang taka a lan thu an tarlang a. December, 2020 lo thleng tur hi Mizoram-a kan hunpui a nih avangin inkaihhruaina te khauh taka kalpui chhunzawm zel a ngai tih pawh tarlangin, hei vang hian 'COVID-19 No Tolerance Drive' chu Dec. 1, 2020 atanga kumthar January 10, 2021 thleng hman chhunzawm tur a ni tih an tarlang a ni.

Thla thar atanga hman tur 'COVID-19 No Tolerance Drive' kaih-hruaina tihchhuah thar ah hian Rampâwn atanga Mizoram luh chungchang ah tuna kalphung chu hman chhunzawm zel a ni anga, Sawrkar Office leh Office dang kalpui chungchangah COVID-19 Executive Duty tura ruat tawh te chu Deputy Commissioner-te ruahman angin Krismas leh kumthar hunpui laiin an thawk chhunzawm ang. Mipui vantlâng tana inkhuahkhirhna-ah District Hqrs. ah te chuan zân dar 8:00 leh zing dar 4:30 inkarah pawn chhuah khap a ni dawn a, phalna nei lova vantlang hmuna mi 5 (panga) aia tam awmkhawm khap a ni bawk anga, heng bak chu a hmaa kalphung anga kal chhunzawm zel a ni bawk ang.

Zirna In hrang hrangte chu khar chhunzawm tur a ni dawn a, Sakhaw biakna hmunah mipui punkhawmna huaihawt phal ni lovin Krismas leh kumthar hunpui laiin Sawrkar programme pawimawh bik tih loh mipui hip thei programme rêng rêng huaihawt khap a ni a, hei hian Chhiatni/thatni a huam lovang a, Biak In-a zing tawngtai erawh chu mi 35 aia tam lo tan neih phal a ni a, mitthi vuina leh inneihna-ah mi 35 aia tam punkhawm khap a ni bawk. Dawr leh sumdawnna hmunte chu inhawn phalsak an ni a, Dawr zawng zawng chu (damdawi dawr tiam lovin) tlai dar 5:00 hma-in khar vek tur a ni thung. Mipuiin awlsam zawka thlai leh chawhmeh an hmuh theih nan Vêng hrang hrangah LLTF/VLTF ten chawhmeh zawrhna tur hmun an ruahman anga, Inrinni-a mipui punkhawm luih luih pumpelh nan kar khatah ni 3 (thum) tal thlai thar leh chawhmeh dang zawrhna hun ruahman thin tur a ni bawk.

Comments

Chhiar Hlawhte