Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

COVID-19 vaccine sem leh buaipui dan tur Prime Minister hovin sawiho a ni

Prime Minister, Narendra Modi hovin India ram State hrang hranga Chief Minister te chuan nimin khan Video Conference hmanga inbiakna neiin COVID-19 Vaccine sem dan leh buaipui zui dan tur chungchang an sawiho a, Mizo-ram Chief Minister, Zoramthanga pawh a tel.

He inbiakna ah hian Prime Minister, Narendra Modi chuan COVID-19 chungchangah State hrang hrang hmalakna leh he hrik danna tur vaccine hman a nih theih veleh a mipui a pek dan tur chungchanga ruahmanna sawrkar laipuiin a siam chungchang te sawiin, State tin te chu COVID-19 hri a darh zau belh zel loh nan fimkhur taka hma la zui zel tur leh tha thlah lo turin a chah a. Vaccine awm chu fimkhurna lama inthlahdul phah nan a hman chi a nihloh thu a sawi bawk.

He hunah hian NITI Aayog Member, V.K. Paul chuan sawrkar laipui ruahmanna tlangpui sawiin, vaccine hi pekchhuah theih a nih veleh a thawh khatna atan ram pumah Provisional Priority Group mi vbc. 30 vel awm tura ruahman a ni a, chungte chu - Health Care Workers, Frontline Workers, kum 50 chunglam (vbc. 26) leh kum 50 la tlinglo, natna dang Association Comorbidity nei te an nih thu a tarlang a. State leh Union Terroritory hrang hrang te nen inbia in, Data Collection pawh ngawrh taka kalpui mek a nih thu leh Cold Chain Storage an mamawh dan te thlithlai sak bawk niin, December thla tir atangin State/UT te tan Cold Chain Storage tih chang-tlunna tura an mamawhte supply tum a nih thu a sawi bawk. He huna tel Mizoram Chief Minister, Zoramthanga hi Health & Family Welfare Minister Dr. R. Lalthangliana, Chief Secretary Lalnunmawia Chuaungo leh Health Secretary ten an tawiawm a ni. 

Prime Minister, Narendra Modi hian ramchhunga COVID-19 hri darh zualna State pariat- Haryana, Delhi, Chhattisgarh, Kerala, Maharashtra, Rajasthan, Gujarat leh West Bengal hruaitute chu a hranpaa kawm bawkin Oxygen leh ventilator indaihlohna phuhru turin PM Cares Fund atangin sum pekchhuah a nih thu a sawi a, hetihlai hian mipuiten hripui chu an la lap ta-in, hmun tam takah hri a darh leh thu a sawi a. Hri leng khuahkhirh leh turin hri kai leh kai lo endikna leh hri kaite bulhnaia awmte chhuizui hna rang taka thawh a tul thu a sawi bawk.

Comments

Chhiar Hlawhte