Kum 9 chhungin Mizoram-ah kangmei vangin vbc. 53 hu kangralin mi 31 in nunna an chan tawh

Kum 2012 atanga kumin (2020) October thla thleng khan Mizoram-ah kangmei vangin Rs. 53,90,42,659/- hu bungraw kang chhia (value of property damage) a awm a, hemi hun chhung vek hian kangmei vanga nunna chan mi 31 an awm bawk.

Fire & Emergency Services (F&ES) chhinchhiah danin kum 9 kalta chhunga kangmei vanga bungraw kangchhe tam ber kum chu kum 2012 kha niin hemi kum hian bungrua Rs. 18,60,68,350/- hu a kangchhia a, hemi kum hi kangmei vanga nunna chan an tam ber kum ni bawkin mi 9 laiin nunna an chan bawk a ni. Kum 2014-ah mi 8 in nunna chanin kum 2015-ah mi 5 in nunna an chan leh bawk a, kum 2013 leh 2019-ah mi 3 ve ve in nunna chanin kum 2016-ah mi pahnih in nunna an chan a, kumin ah nunna chan mi pakhat awm tawhin kum 2017 leh 2018-ah kangmei vanga nunna chan an awmlo thung a ni.

Kumin bikah January atanga October thleng khan Mizoram-ah chenna In kang (House fire) 29 leh ram kang (forest fire) 128 awmin, kangmei vanga thi 1 a awm a, kangmei vanga inhliam mi 7 an awm bawk. Kangmei chhuak avang hian kumin January-ah Rs. 65,32,240/- hu bungraw kang chhia a awm a, February-ah Rs. 90,80,000/- hu awmin, March-ah Rs. 86,37,328/- hu leh April-ah Rs. 21,15,500/- hu a awm a, May-ah Rs. 1,00,000/- hu awmin, June-ah Rs. 70,000/- hu, July-ah Rs. 22,000/- hu a awm bawk a, August Rs. 9,24,500/- hu, September-ah Rs. 5,02,200/- hu leh October-ah Rs. 4,67,500/- hu bungraw kangchhia a awm niin chhinchhiah a ni a. Kumin chhung hian Rs. 2,84,51,268/- hu bungraw kangchhia awm a awm tawh a ni.

Mizoram-a Fire Station 14 awm mek ten an chhinchhiah zingah kumin chhunga bungraw kangchhia tamna ber chu Bawngkawn Fire Station-ah niin bungraw kangchhia Rs. 93,40,000/- hu a awm anga chhinchhiah a ni a, Khatla Fire Station-ah bungraw kangchhia Rs. 62,41,528/- hu a awm anga chhinchhiah ni bawkin Aizawl Fire Station-ah Rs. 28,81,240/- hu kangchhia a awm anga chhinchhiah a ni bawk. Hemi hun chhung hian Serchhip Fire Station-ah pawh bungraw kangchhia Rs. 36,80,000/- hu a awm anga chhinchhiah niin Kolasib leh Tlabung Fire Station-ah erawh bungraw kangchhia chhinchhiah a awmlo thung a ni.