Serchhip District atanga Bihar inthlan-a kal zingah hri kai 40 hmuhchhuah an ni tawh

Tunhnaia Bihar inthlanpui-a Serchhip District atanga Duty tura kal zingah COVID-19 hri kai mi 40 zet an awm tawh a, Serchhip District-a TrueNat Laboratory hman theiha hawn a nih hnuah he Laboratory atang hian hri kai 95 zet hmuhchhuah ni tawhin Serchhip District-a hri kai hmuhchhuah zinga a zatve aia tam chu he Laboratory atanga hmuh an ni.

Serchhip CMO Office atanga thu kan dawn danin niminpiah khan Serchhip District-a TrueNat Laboratory-ah Sample 67 enfiah niin heng atang hian COVID-19 hri kai mi 10 hmuh an ni a, heng hri kai te hi mipa vek niin an zinga mi 8 te hi Mizoram Police, PTS Thenzawl-a inkhung-hrang lai niin tunhnaia Bihar inthlanna a Duty, tun thla ni 11-a Serchhip District rawn thleng an ni a, midang pahnih hi BSF Sipai bawk niin Bihar inthlanna a duty-a kal, tun thla ni 13-a Serchhip District rawn thleng leh Thenzawl-a Tribal Girl’s Hostel-a inkhunghrang an ni thung.

Thudawn danin tunhnaia Bihar inthlanna a Serchhip District atanga Duty tura kal zingah COVID-19 hri kai hmuhchhuah chu mi 40 zet an tling tawh a, Serchhip atanga he inthlanna a Police kal mi 57 zingah tun thlengin hri kai 28 an awm tawh a, BSF Sipai Bihar inthlanna a duty mi 66 zingah hri kai 12 an awm tawh bawk a, heng inthlanna a Duty te hi an Sample enfiah vek an ni tawh a ni.

Niminpiah thleng khan Serchhip District-a COVID-19 hri kai hmuhchhuah chu 152 an tling ta a, heng zinga mi 93 te chu enkawl dam ni tawhin tunah hian hri kai enkawllai 59 an la awm mek a, District dang atanga hri kai enkawl tur rawn dah te nen Serchhip District-a COVID-19 hri kai enkawllai chu 63 an ni thung.

Serchhip District-a TrueNat Laboratory hawn a nih hnuah he Laboratory atang hian hri kai hmuhchhuah pawh an pung zel a, nimin thlenga Serchhip District-a COVID-19 hri kai hmuhchhuah tawh mi 152 zinga 95 te chu TrueNat Laboratory atanga hri kai hmuhchhuah niin Rapid Antigen Test hmangin hri kai 47 hmuh an ni tawh bawk a, Serchhip District-a hri kai enfiahna a awm hmaa ZMC RT-PCR Laboratory-a Sample enfiah atangin hri kai 10 hmuh an ni bawk.

Serchhip District-ah hian hri leng vanga mahni In lama inkhunghrang mi 74 leh sawrkar hmuna inkhunghrang 289 an la awm mek a ni.