Lenkawl

Serchhip Sub-Hqrs. YMA chuan nizan khan Serchhip khawpui chhunga YMA Branch te tan Serchhip P&E Veng YMA Hall-ah YMA Kum-puan ‘Ram leh Hnam humhalh’ tih pualin Kumpuan Inkhawm an nei a, he hun hi Kumpuan Committee Chairman Lalrammawia chuan kaihruaiin thupui sawitu atan Lalrinawma Sohnel chu hman a ni a, YMA in Kumpuan atana ‘Ram leh Hnam hum-halh’ a puan chhan leh hemi kawnga hmalak a tulna hrang hrangte ngaihthlak niin kalkhawmte atangin sawihona neih zui a ni a, YMA hruaitu mi 100 rual zet an tel a ni.

JAC on Serchhip District Hospital Site hruaitute chuan Serchhip District Hospital building thar sak tur chungchangah an pawl Executive Meeting in rel angin, “Engti kawng zawng maha sawnchhuah hi kan rem ti lo tih hi JAC dinna a ni,” an ti a. Hospital sakna tura CSR Fund hmuh chu a lapse a nih chuan an thiamloh a nih loh thu an sawi bawk.

Mizo Zaimi Inzawmkhawm (MZI) chuan nimin khan an dinchampha vawi 42-na an lawm a, MZI Hqrs. Serchhip pawhin an dincham pual hian hun an hmang a ni.

Serchhip District-ah COVID-19 hri kai enkawllai tlem leh hretin nimin tlai thlengin hri kai enkawllai mi 13 an awm.

Nimin khan Serchhip District-ah ASF hri leng avanga Vawk thi leh suat belh awm lovin hri lenna hmun ni lo khaw dangah Vawk thi leh suat a awm belh lo bawk a ni.

Tuikum bialtu MLA leh Assembly Deputy Speaker Er. Lalrinawma chuan nimin khan a bial chhunga Sialhau khua tlawhin Buanhmun Handloom Cluster hnuaia puantah-a eizawn tumte nen inkawmna an nei.

Fostering Climate-Resilient Upland Farming Systems (FOCUS) Serchhip District leh AH&Vety Department chuan nimin khan Ser-chhip P&E Veng-a AH&Vety Department Training Hall-ah Serchhip Bawngchawm-a Kel vulhtu, Livestock Farmers Co-Operative Society leh Hmawngkawn khuaa Kel vulh Association te tan Kel vulh dan zirhona hun an buatsaih a, he hun hi Serchhip DVO Dr. R. Lalmakthanga chuan hawngin FOCUS-a mithiam ten zirtirna an pe a ni. Training-ah hian Kel vulhtu mi 12 an tel a ni.

Tunlaia Aizawl khawchhunga Motor khu teh hna kalpui mek chu Commisioner & Secretary, Transport Department KT. Beicho IRAS hovin niminpiah khan Transport Department hotute leh Mizoram Pollution Control Board hotute chuan a hmunah an enpui a, Motor khu tehna hi Aizawl khawpuiah hian hmun thum MINECO, Khatla; Bawngkawn Brigade Field kawng leh Zemabawk Field chhakah te kalpui niin mipui lam atanga dawrtu an thahnem thei hle a ni. Central Motor Vehicle Rules, 1989 in a phut angin motor khu avanga boruak bawlhhlawh tur ven nan motor eng chi pawhin Pollution Under Control Certificate (PUC) hi an nei ngei tur a ni a, he Certificate hi thla ruk (6) chhung dam (Valid) niin Motor thar chu kum khat chhung test a ngai lo thung.

Lunglei District chhunga Bank hrang hrang te hmalak dan thlirin nimin khan District Consultative Committee/District Level Review Committee/District Level Security Committee chu an Chairman leh Lunglei DC Kulothungan A IAS hovin an thukhawm a, he hunah hian kumin June thla tawp Quarter thlenga Bank te hmalak dan thlirho niin Bank hrang hrang ten Bank Security an neih bakah CCTV, Fire Extinguisher leh Security Alarm System dah thu tarlan a ni a. Bank zawng zawngin mipuite hnena Coin dawn leh pekchhuah pawm tur a tih niin Lunglei District chhunga Bank Credit Deposit Ratio (CD Ratio) April-June 2022-ah 65.12% a ni a, Reserve Bank of India in CD Ratio a bituk zat chu 60% a ni.

Nimin tlai thleng khan Mizoram-ah COVID-19 hri kai enkawllai mi 450 an la awm.

Nimin khan Lawngtlai District tana Family Oriented SEDP hawnna neih niin Agriculture Development Board Vice Chairman H. Biakzaua MLA chuan a hmanpui a ni.

Tunhnai kum hnih chhungin rampawn atanga Mizoram rawn tlawhtu mi 209 awmin ramchhung (domestic) atanga Mizoram rawn tlawh erawh kum hnih chhungin mi 80,183 an awm thung.

Central YMA rorelna sang, Central Executive Committee (2021-2023) Meeting vawi 16-na chuan ruihhlo do tur, 'Central Anti Drugs Squad' (CADS) a din a, Central YMA President R. Lalngheta chuan drugs bikah hma an la dawn tih a sawi.

Rural Development (RD) Minister Lalruatkima chuan, “SEDP chu kuthnathawktute leh mahni a eizawnna hrang hrang nei te dinkhawchhuahna a lo nih theihnan leh lei rual rem an rah theih nana sawrkarin kawng a hawnsakna a ni,” a ti.

Kum 2018 atanga kumin 2022 chhungin Mizoram-ah sawrkar hnathawk eiruk thubuai siamsak mi 21 an awm tawh a, thiamloh chantir (convict) tawh mi 14 an awm bawk.

Mizoram sawrkar Council of Ministers nimin-a thukhawm chuan Sawrkar-in phalna a pek te hnenah Mizoram thar Grape atanga Wine siam leh hralh a remti.

Serchhip District chhunga Assembly Bial pathum atangin ‘Family Oriented SEDP’ dawng tur mi 4499 te thlanfel an ni tawh a, Line Departmenty 9 zingah AH&Vety Department chu Beneficiary ngah ber an nih laiin Tourism Department hnuaia Trade thlang erawh an awm lo nia hriat a ni.

National Immunization Schedule (NIS) hnuaia raipuar leh naupang te hnena Vaccine pek thin leh pek dan a dik leh dikloh enfiahna Effective Vaccine Managment Assessment (EVMA) chu Mizoram-ah a vawi khatna atan neih niin Serchhip District chu nimin khan rawn enfiah a ni.

Serchhip Block Congress Committee chuan nimin khan Serchhip-ah ‘Workers Meet’ an buat-saih a, he hun hi MPCC hruaitu ten Aizawl atangin an rawn hmanpui a ni.

Serchhip District Bharat Scout & Guides Council chu nimin khan District Bawrhsap leh District President Nazuk Kumar IAS hovin DC Meeting Hall-ah an thukhawm a, he hunah hian kumin a hmalakna tur hrang hrang relin District chhunga Unit thar din belh dan tur te, Scout Master leh Cup Master training buatsaih dan turte, kumin chhunga District Scout & Guides in a tihtur hmachhawp hrang hrang te, Joint Hiking nei dan turte, Camp Fire buatsaih dan turte, Social Works Day neih dan tur leh sum leh pai tuak dan turte an sawiho a ni a. He thutkhawm hi Scout & Guides State Secretary Lalngilneia Kawlni chuan a rawn telpui a ni.

Thla thar September 5-a Zirtirtute Ni (Teachers' Day) lo thleng tur Serchhip-a hman dan tur ngaihtuahin Serchhip District Bawrhsap Nazuk Kumar IAS hovin sawrkar mi pawimawh te chu Serchhip DC Meeting Hall-ah an thukhawm a, Meeting hian Zirtirtute Ni chu sikul tinin Zirtirtute chawimawina lam programme anmahni remchan danin lo hmang se an tih bakah Serchhip khawchhung ah Banner pali (4) tar in, Bawrhsap in he ni puala thuchah mipuite hnenah siamin thehdarh dan tur an ruahman a, National Fund for Teacher Welfare (NFTW) lakkhawm dan tur pawh an ruahman nghal bawk. He thutkhawm ah hian Bawrhsap hovin District chhunga zirna dinhmun te sawihona neih zui nghal a ni bawk.

Nimin khan Serchhip District chhunga East Lungdar khua ah ASF vanga Vawk thi pakhat awm belh lehin kumin chhungin East Lungdar-ah hian ASF vangin Vawk 103 a thi ta a ni. Heng te nen hian kumin chhung hian Serchhip District-ah ASF vangin Vawk 289 a thi tawh a, Vawk 384 suat a ni tawh bawk a ni.

Thla thar September 6-a Baktawng Village Council By-election 2022-a hman tur Ballot Paper chu naktuk, August 31, 2022 (Nilaini) hian Serchhip DC Office-a Election Branch-ah print a ni dawn a, hei vang hian naktuk-ah Serchhip DC Office-a Election Branch hi mipuite tan dawr theih an ni dawn lova, mipuite hriatthiamna an ngen a ni.

Nimin khan Serchhip District-ah COVID-19 hri kai mi 5 hmuh belh niin hri kai mi 8 te chu anmahni enkawlna hmun atanga chhuahtir an ni bawk.

Lunglei Sub-Hqrs. YMA chuan Aizawl-Thenzawl-Lunglei (ATL) Road-a Lunglei District Area chin chhe lutuk chu hnathawktu Contractor Bahvya Construction Pvt.Ltd. ten an ngaihthah vang nia sawiin, lirthei neitu leh mipui ten harsatna an tawk nasa hle niin an sawi a. Kawngchhia siamthat hna chu Contractor mawhphurhna, Defect Liability Period-a la nih thu pawh sawiin, “Hetiang a nih mek lai hian Contractor hian a siamtha lo ni mai lovin, siamtha tura PWD lamin an hrilh pawhin awmzia a nei lo a, an ko ei zo lo a ni, tiin thuchhuah siamin an tarlang a. A mawh-phurhna anga Contractor in hma a la duh lo leh koh pawh koh ei theih a ni lo chu Mizoram leh Mizo mipuite zah lohna nia sawiin, Contractor be turin Chief Minister chu ngen an rel bawk.

Hnahthial Thalai Pawl (HTP) chuan an khuaa BDO hna chelh mektu chu BDO ni chhunzawm zel tlakah an ngai lo tih an sawi.

Champhai District chhunga National Bank for Agriculture and Rural Development (NA-BARD) kaltlanga hmalakna hrang hrangte enfiaha viltu tura tun thla ni 2-a din District Level Review & Monitoring Committee (DLRMC) chu nimin khan a vawi khatna atan an thukhawm a, he hunah hian NABARD Project RIDF leh WIF hlutna leh tangkai taka hman a nih theih nana hmalak tulte sawiho a ni a. Line department-te chu an hnuaia NABARD Project kalpui mekte zirchianga hemi Project hnuaia hmalak theihna te pawh Department hotute nena inrawn chunga lo inruahman lawk tura tih an ni a. NABARD Project kalpui mekte a hun taka zawhfel a nih theih nan te, harsatna awmte enfiaha thuneitu sang zawka thlen a nih theih nan a hmunah tlawha zirchian thin ni se tih a ni bawk. Tun dinhmunah Champhai District-ah Stakeholder Line Department 12 te kaltlangin RIDF Project 45 leh WIF Project 8 kalpui mek a ni.

NABARD Mizoram Regional Office General Manager KVSSLV Prasada Rao chuan nimin khan Chief Minister Zoramthanga chu a Pisa-ah hmuin RIDF XXVIII hnuaia Mizoram chhunga Rural Infrastructure Project hmalakna tur cheng vbc. 230 allocate a nih thu NABARD Chairman in a hriattirna lehkha a pe a. Chief Minister chuan hmasawnna hnathawh kawnga NABARD nen thawhhona tha tak Mizoram in a nei chu lawmawm a tih thu sawiin, hmachhawp hrang hrangte mipui chhawr tlaka tihhlawhtlin ngei a nih a beisei thu a sawi a. NABARD General Manager chuan RIDF Project hrang hrang Mizoram a thawh mek bakah NABARD hmalakna dang hrang hrang, Mizorama thawh theih te a sawipui bawk a ni. NABARD hian tuihna humhalh kawng ah te, Tribal Development atana hmalakna te, sum khawl leh hman chungchanga inzirtirna te, Bank Refinance leh hmalakna dangte a thawk thin a ni.

Pathianni khan Mizoram-ah COVID-19 hri kai mi 21 hmuh belh niin nimin khan hri kai mi 156 te anmahni enkawlna hmun atanga chhuahtir an ni.

Mizoram Sawrkar Flagship Programme - Socio Economic Development Programme (SEDP) hnuaia ‘Family Oriented SEDP’ tlangzarhna hun chu nimin khan Lunglei-ah neih a ni.

Lunglei District chhung Thangpui khuaa Zirtirtu, naupang Uniform phelh saka puh chu nimin khan Department in Suspend Order a tichhuak a, Show Cause Notice pek a nih angin Lunglei South SDEO in a tanna hmunah a insawifiahna a ngaihthlak sak bawk.

National Sports Day, 2022 chu nimin khan SAI Contact Sports Centre, Mission Vengthlang-ah hman niin he hun hi Sports Minister Robert Romawia Royte chuan a hmanpui a ni.

Serchhip Vengchung Branch YMA te chuan Inrinni khan Serchhip Blood Bank-a dah turin thisen Unit 27 an pe a, thisen petute hi Mipa 22 leh Hmeichhia 5 niin Serchhip Blood Bank-ah damlo te mamawh thisen dahkhawl a awm theih nana AVBD Serchhip ten tlawmngai thisen pek hun an ruahman anga thisen hi pe an ni.

Serchhip District chhunga COVID-19 hri kai hmuhchhuah Zopari (70), North Vanlaiphai chu nimin chawhma dar 11:30 khan ZMC-ah a boral a, Vawiin hian vuiliam tur a ni ang. Zopari hian tun thla ni 23 khan COVID-19 hri a kai tih hmuhchhuah niin nimin zing dar 3:00 vel khan ZMC-ah hian dahluh a ni a, a boral zui ta a ni. Heti hian Serchhip District-a COVID-19 hri kai hmuhchhuah zingah mi 36 an boral ta a, kumin May 2 hnu lama Serchhip District-a COVID-19 hri kai boral an awm lehna hmasa ber a ni bawk.

Cheng nuai 99 chuang senga sak Presbyterian Church of India Chhiahtlang Kawn Veng Kohhran Biak In chu Inrinni khan Mizoram Synod Executive Secretary (Sr) Rev. C. Zorammawia chuan a hawng a, Biak In thar lawmna puala inkhawm Bialtu Pastor Rev.C. Lalsanglura kaih-hruaia neih ah Rev. C. Zorammawia hian thuchah a sawi nghal bawk a, he hunah hian Kohhran mipui thahnem tak an tel a ni.

Nimin tlai thleng khan Serchhip District-ah COVID-19 hri kai enkawllai mi 18 an la awm.

Serchhip Auto Rickshaw Owners Association te chuan Inrinni khan Bukpui-a P&E Rest House-ah an dinchampha lawmin Assembly an nei a, kum 2022-2023 chhunga an pawl hruaitu tur thlanna neiin President-ah Malsawmtluanga (Chhim Veng); Vice President-ah H. Lalsawimawia (New Serchhip); Secretary-ah Lallawmsiama Vengchung); Asst. Secretary-ah Romal-sawma (Vengchung); Treasurer-ah Liansangpuia (New Serchhip) leh Fin. Secretary-ah Lalbiak-mawia (Bazar Hnuai) te thlan an ni. SAROA Assembly hian an pawl dinchampha kum 25-na nakum-a lo thleng tur pualin Serchhip Blood Ban-ah thisen pek nise an tih bakah a thlawnin ni khat (2) mipuite tan service nise an ti a. Hei bakah hian khawtlang-ah khuarel chhiat tawk, khawtlang buaipui ngai an awmin an pawl hminga luanchhuah ve thin an rel bawk.

Zirtawpni zan leh Inrinni chhun lama ruah tam tham tak sur avang khan Serchhip District chhung khaw thenkhat ah chhiatna thleng awmin mihring nunna atana hlauhawm thleng erawh a awm lo thung. Chekawn leh N. Mualcheng inkar Thalbul lui leh Varhva lui chu ruahsur nasa avanga lianin hei hian heng lui ringa awm leilet a tichhe nasa hle a, hriat theih chinah Chekawn khuaa chhungkaw 8 leh North Mualcheng-a chhungkaw pahnih ten tuilian hi an tuar a, heng Leilet-a buh chhia hi phur 100 chuang ni tura ngaih a ni bawk. Leilet bakah hian Sangha Dil te pawh nasa taka chhiain Sangha khawilai a chhuak nasa hle bawk a ni. Helai hmuna Leilet neitute chuan thangkhat lian zet chu hetianga tuilian hi a thlen tawh loh thu an sawi a ni.

Serchhip Sub-Hqrs. YMA chuan Inrinni khan an Office Conference Hall-ah an President Kawlthuama kaihhruaiin SEC thutkhawm an nei a, kumin-a YMA Rorel Inkhawm neih tura ngaihtuah tura rawtna lut hrang hrang atangin Agenda pali (4) chu Central YMA-ah thehluh nise an ti a ni. SEC Meeting hian nakum-a Serchhip Sub-Hqrs. YMA Conference thlen dil duh tan kumin December thla tawp thleng dilna thehluh theih nise an tih bakah Serchhip Damdawi In-ah kuang dah sa a awm tawh mang loh avangin dah belh dan tur ngaihtuahin, Kuang la dah lo Branch te dah turin an beisei a, Sub-Hqrs. YMA Sports & Recreation Committee in kumin October 25 atanga Inter-Branch YMA Football Tournament neih an rawtna pawh an pawmpui bawk.

Assembly Deputy Speaker leh Tuikum bialtu MLA Er. Lalrinawma chuan infiamna huang hrang hrang ah eizawn theihna a awm tawh avangin theihtawp chhuaha beitute tan chuan kawng zau takin a inhawng tawh tih sawiin, thalaite pawhin nunkawng thalo laka inthiarfihlim zel nan te hmang se a duh thu a sawi bawk.

Govt. Serchhip College-a Department of Botany leh Food Myco Lab., Serchhip te buatsaih ni 2 awh 'Entrepreneurship and Skill Development Workshop On Mushroom Cultivation' chu Inrinni khan zawhfel niin Bawrhsap Nazuk Kumar IAS chuan a hmanpui a ni.

Thla thar September 6, 2022 atanga neih tur Mizoram Legislative Assembly Favang thutkhawm chu ni thum (3) chhung nei turin Assembly Speaker Lalrinliana Sailo kaihhruai Bussiness Advisory Committee chuan an ruahman a, Sptember 6 atanga ni 8 thleng thutkhawm hi neihh a ni dawn a ni. Tun tum Session-a ngaihtuah tur hian Zirtawpni thleng khan Sawrkar Bill pakhat a lut tawh a, Zawhna (starred question) 188 leh ziaka chhan chi zawhna (unstarred question) 104 a luh tawh bakah Paper lay tur pathum a lut tawh bawk a ni.

LAD Minister K. Lalrinliana chuan Inrinni khan North Eastern Council (NEC) hnuaia Mau chingtu mi 30 hnenah plastic Tuizem litres 1,500 dawng a sem a, Tuizem dawngtute hi Damdiai Bamboo Grower Society, Kolasib hnuaia Mau chingtute niin he Society hnuaiah hian Mau chingtu mi 67 an awm a, a thawh khatna atan mi 30 te hnenah hian Tuizem hi sem a ni. Minister chuan Damdiai Bamboo Grower Society-a Brandasi leh Longiphathus mau chingtu chhungkaw 67 an awm chu lawmawm a tih thu a sawi bawk.

Tun thla ni 25 atanga neih 6th Mizoram State MMA (Mixed Martial Arts) Amateur Championship 2022 kharna inkhawm chu Inrinni khan Elite MMA & Fitness Gym, Aizawl-ah neih niin MISMA Patron leh P&E Minister R. Lalzirliana chuan a hmanpui a, Mizo ten game kan thlan thiam a tul a tih thu leh MMA hi Mizote tana tha nia a hriat thu a sawi a, MISMA in sawrkar puihna tel lova thalaite an promote vangin lawmawm a tih thu a sawi bawk. He intihsiakna ah hian Mi-zoram District 9 atangin infiammi za vel an tel a, Dawrpui Contact Sports (SPES Gym) chuan Gold Medal 8, Silver Medal 3 leh Bronze Medal 4 la-in Team Champion an ni a, H. Lalruatfela (Elite) chu Most Promising Fighter atan thlan niin, Best Fighter atan Nazareth Lalthazuala (Alpha Gym) chu thlan a ni bawk.

Nimin tlai thleng khan Mizoram-ah COVID-19 hri kai enkawllai mi 570 an la awm.

SIPMIU in Aizawl khawpui chawmtu tur Tlawng lui tui lakna hna an thawh mek ah sum vbc. 200 bawr vel sen a ni tawhin hna 92% vel zawh a ni tawh.

Mizoram sawrkar sum harsatna thleng mek vangin sawrkar hnathawkte August, 2022 hlawh lak hun a tlai leh dawn nia thudawn a ni a, hetihlai hian hlawh buaipuitu, Drawing and Disbursing Officer (DDO) te chuan hlawh tur Treasury-ah an thehlut mek nia thudawn a ni.

Kumin March thla bul atanga Mizoram-a leng nawn Vawk hri leng, African Swine Fever (ASF) avanga nitin-a Mizoram-a Vawk thi chu a tlem chho zel a, he Vawk pulhri leng hi a reh dawn hnai ni a ngaih a ni.

Lunglei District-a Thangpui Govt. Primary School-a pawl khat zirlai naupang a School thawmhnaw phelhsak a hawtirtu-a puh an Zirtirtu chu Inrinni khan Police ten thu zawhfiah turin an la a, Vawiin hian School Education Department chuan a hremna tihchhuah an tum bawk.

Mizoram-ah kum 2018-2019 kum kha HIV positive san lai ber a ni a, tunhnaiah tlemin ziaawm deuh angin lang mah se hri vei hian ziaawm lam a la pan thei lo.

Integrated Disease Surveillance Programme (IDSP)-a State Nodal Officer Dr. Pachuau Lalmalsawma chuan ‘Khawvel pumpui chawkbuaitu leh mi tam tak nunna suattu Coronavirus COVID-19’ tih lehkhabu Dr. C. Sangluaii ziah chu nimin khan a tlangzarh.

Serchhip District-a Integrated Disease Surveillance Programme (IDSP) hnuaia Integrated Health Information Platform (IHIP) kalpui dan thlirletna leh COVID-19 hri leng bakah tunlaia hri leng thenkhat chungchang thlirhona chu nimin khan Serchhip CMO Office-ah neih a ni a, he hun hi Aizawl lam atangin IDSP State Nodal Officer Dr. Pachuau Lalmalsawma leh thawktu dang ten rawn hmanpuiin tunhnaia hri leng Monkey Pox leh Tomato flu chungchang te a sawifiah bawk a ni.

Sawrkar laipui in Registration of Electors (Amendment) Rules, 2022 a siam thar chu hman tan a nih tak avangin Serchhip District chhunga Booth Level Officer (BLO) te tan hemi chungchang zirhona hi nimin khan Serchhip-ah neih a ni a, hemi kaihhnawiha a Form siam thar hrang hrangte fill-up dan chu a tak anga tihchhin a ni bawk.

Kumin chhungin Serchhip District-ah mi pahnih ten an thih hnuah midang tan an Mit an pe tawh.

Mizoram sawrkar Planning and Prog-ramme Implementation Department hnuaia Entrepreneurship Development Centre bultumin nimin khan Govt. Serchhip College-a Department of Botany leh Food Myco Lab., Serchhip te chuan 'Entrepreneurship and Skill  Development Workshop On Mushroom Cultivation' an buatsaih.

Joint Action Committee on Serchhip District Hospital Site chuan nimin khan Serchhip Press Club-ah Executive Committee thutkhawm neiin Serchhip District Hospital Building thar sak thuai a nih theihnan Public Interest Litigation (PIL) thehluh an rel a, karleh Thawhtanni (Aug. 29, 2022) khian Serchhip NGO Coordination Committee te chu inbiakna neihpui ah sawm nise an ti bawk.

Serchhip District chhungah nimin khan African Swine Fever (ASF) vanga Vawk thi leh suat a awm belh lova, hri lenna hmuna puan ni lo khaw dangah pawh Vawk thi chhinchhiah belh awm lovin Leng khua ah Vawk pakhat suat a ni thung. Heti hian kumin chhungin Serchhip District-a ASF hri lenna khaw 8-ah ASF vanga Vawk thi chu 286 niin Vawk 384 suat a ni tawh a. ASF hri lenna hmun ni lo khaw 11-ah Vawk 24 thi tawhin Vawk 103 suat a ni tawh bawk.

Nimin khan Serchhip District-ah COVID-19 hri kai mi 5 hmuh belh niin hri kai enkawl dam erawh an awm belh lo thung.

Women Empowerment & Child Development/Child Friendly chungchanga rampum a hma la tha Panchayat 8 thlanchhuah zinga tel Serchhip District chhung Leng khuaa Village Council President B. Vanlalfinga chuan tun thla, August ni 24 khan Kochi, Kerela-ah Presentation a pe a, Mizoram sawrkar LAD-a Director leh Officer thenkhat ten an tawiawm a ni. He hunah hian Hmeichhia leh naupangte dinhmun chawikanna tura an khawtlang in hma an lakna hrang hrangte a tarlang a ni.

Working Committee for Anthurium Festival chu nimin khan an Chairman leh Joint Secretary, Tourism Department ni bawk V. Lalengmawia hovin a Pisa-ah an thukhawm a, Covid hripui avangin kum 2 chhung Virtual-a hman a nih hnuah kumin hian Anthurium Festival chu Reiek Tourist Resort-ah mipui chhim theih tura hman an rel a, October 14 leh 15-ah hman tura ruahman niin Mizo hnamzia phochhuahna hun atan hman tura ruahman niin Hnam lam, Zaithiam/band leh Fashion Show te bakah intihlimna chi hrang hrang entir leh a ni dawn a ni.

Mizoram-a Secondary School zirlaite hnena Vocational Interest Research Project neihna tur atan nimin khan Samagra Shiksha Mizoram leh Institute of Advance Studies in Education (IASE) ten Samagra Shiksha Conference Hall-ah thawh-hona thuthlung an ziak a, Samagra Shiksha aiawhin Lalhmachhuana, SPD leh IASE aiawhin Prof. Lallianzuali Fanai, Principal ten an hming an ziak a ni. Vocational Interest Research Project hi Secondary School zirlaite eizawnna ah eng lam kawng zawh tir chi nge an nih tih hriat theihna tur a ni a, zirlaite tuina lam leh an kalkawng thlanpui theihna tur Research Project a ni.

Aizawl khawpui bawlhhlawh tawih thei tlingkhawm atanga Aizawl Municipal Corporation (AMC)-in leitha (Compost) an siam zawrhna tur Dawr (Stall) chu nimin khan Aizawl-a AMC Office hnuaiah Mayor Lalrinenga Sailo chuan a hawng a, AMC hian leitha siam tur hian firm pakhat, Waste Tech & Bio Energy chu an thawhpui a; leitha hi kg 15 leh 25 bag awmin mipui hnenah kg-ah Rs. 10/- hisapa hralhchhuah tura ruahman a ni. He hunah hian Mayor chuan AMC-in kumin January thla tawpah SIPMIU hnen atangin Tuirial-a Waste Management Centre an lakchhawn thu leh, sum leh pai a ken tel loh avangin AMC pawisa in an enkawl zui thu a sawi a ni.

Nimin tlai thleng khan Mizoram-ah COVID-19 hri kai enkawllai mi 588 an la awm.

Saitual District tana Sawrkar Flagship Programme - Socio Economic Development Programme khuhhawnna chu nimin khan neih niin P&E Minister R. Lalzirliana chuan a hmanpui a ni.

Unique Identification Authority of India (UIDAI), Regional Office, Guwahati buatsaihin nimin khan Aizawl-a Hotel Regency-ah State Level Workshop neih a ni.

Mizoram Youth Commission leh Indian Institute of Management (IIM) Shillong te chuan nimin khan inremna thuthlung, Memorandum of Understanding (MoU) an ziak.

Kolasib-a chhungkaw 89 te hnenah nimin zing khan Pradhan Mantri Ujjwala Yojana (PMUY) kaltlangin eirawngbawlna Gas Connection a thlawna pekchhuah a ni a, he hun hi Supply Minister K. Lalrinliana chuan a hmanpui a ni.

Mizoram sawrkar Flagship Programme, SEDP hnuaia ‘Family Oriented SEDP’ chu State Level-a tlangzarh a nih hnuah Serchhip District-ah pawh tun thla ni 31 khian District Level-a tlangzarhna hun hman a ni dawn a, he hunah hian Village Level Committee te hnenah pawh an hnathawhna tur sum pekchhuah nghal a ni ang.

India rampum-a Football players Registration tih dan kalphung thar, Centralised Registration System (CRS) chungchang zirhona chu nimin khan Serchhip District Football Association (SDFA) hnuaia 1st Division Club te tan neih a ni.

District Institute for Education and Training (DIET) Serchhip chuan kumin a Diploma in Elementary Education (D.El.Ed) pass chhuakte pualin nimin khan Graduation Day an hmang.

Serchhip District chhunga khua leh Veng hrang hrangah Village Defence Party (VDP) din a nih theih nan leh a awmsa te tuaithar a nih theih nan hmalakna kalpui mek a ni.

Serchhip District chhung Zote South khuaa zirna In hrang hranga zirlai naupangte tan nimin khan hriselna kawng hrang hrang inzirtirna neih a ni.

Serchhip Thalai Pawl (STP) ten Serchhip khawpui chhunga Zirna In hrang hrang, High School chin chunglam-a ruihhlo hmansual thatloh zia inzirtirna an neih mekah nimin khan Millennium H/S Chhiahtlang-ah hun hmang lehin zirlaite hnenah zirtirna an pe leh a ni.

Serchhip District-ah nimin tlai thleng khan COVID-19 hri kai enkawllai mi 21 an awm.

Nimin khan Govt. Serchhip College-a Bachelors in Computer Application (BCA) zirlaite tan Add-on-Course buatsaih a ni a, he hunah hian BCA zirlai bikte tan an Syllabus a tello, Computer Trouble Shooting zirhona neih niin Resource Person atan Gover Serchhip College Computer Science Department-a Asst. Professor Lalhmingmawia Kawlni hman a ni a, Computer Setup na siam dan, a Setup dan leh remkhawm dan te zirho a ni.

Kumin chhungin Serchhip District-ah ASF vangin Vawk 286 a thi tawh. AH & Vety Department chhinchhiahna atanga a lan danin nimin khan Serchhip District-a East Lungdar khua ah ASF vanga Vawk thi pakhat awm belh lehin Lungchhuan-ah Vawk 4 suat a ni bawk a, heng te nen hian kumin chhungin Serchhip District-a ASF vanga Vawk thi 286 awmin Vawk 384 suat a ni tawh bawk a ni.

Mizoram Khawpui Fai Intihsiakna 2022 leh India ram Khawpui Fai Intihsiakna, Swachh Survekshan 2023 puala Khawzawl District chhunga faina beihpui thlak tur khuhhawnna leh hmalak bultanna chu nimin zing khan Khawzawl DC CC. Lalchhuangkima hovin hman a ni a, he hunah hian Khawzawl DC hian khawpui chhunga VC hrang hrangte hnenah hnawmbawm a sem chhuak nghal a ni.

Lawngtlai District BJP te chuan Vartek khua a MNF VC Member pali (4) te chu BJP-ah nimin khan Lawngtlai District BJP President Sapliana Vandir chuan a lawmlut nia sawiin, BJP VC thar a ding niin an tarlang a, he hunah hian BJP hruaitu mi thahnem tak an tel bawk a ni.

Lunglei Municipal Council (LMC) Office atan Convention Centre Lunglei-a Second Basement Floor cheithat hna chu thawh mek a ni a, thl thar September thla chawhnu lamah chuan peihfel hman rin a nih thu leh peihfel a nih hunah Deputy Chief Minister in a hawn tur hi Lunglei DUDO Vanthangpuii chuan nimin-a amah kawmtu Lunglei-a MNF Sub-Hqrs. hruaitute a hrilh a, kumin chhunga LMC inthlanna nei turin chak taka hmalak mek a ni bawk.

Mizoram Pollution Control Board-a Single Use Plastic (SUP) Enforcement Squad te chuan nimin khan Lêngpui Airport leh Bairabi Rêl chawlhhmun te tlawhin hman khat daih sarâng khap a nih hnûah he khapna hi zawm a ni em tih an enfiah a, heng hmunah te hian hman khat daih sarang hi an hmang lova, Dan an zawm tha hle tih hmuin, heng lai hmun te hi ‘Single Use Plastic Free’ ah an lo inpuang tih an zu hmu bawk a ni. Mizoram Pollution Control Board chuan mitin te enfiah dâwl taka dân zâwm tha zêl turin a ngên nghal bawk a ni.

Mizoram Rural Bank (MRB) chuan Commonwealth Games 2022 neih zawh taka India tana Hockey (Hmeichhia) inelna a Bronze Medal latu Lalremsiami chu nimin khan Aizawl-a an Office Auditorium-ah an buatsaih a, he hunah hian MRB Chairman V. Jaya Chandra chuan, “India ram National Game chu Hockey a ni a, Remsiami hi chu infiamna a Player pawimawh tak a ni,” tiin Remsiami chu nula chhuanawm tak, chawimawi tlak a nih thu a sawi a. Chutih rualin Mizo thalaite zingah tumruhna neia midang pawh he a hlawhtlinna hian a cho chhuah zel a beisei thu a sawi bawk. MRB hian Remsiami lawmpui nan hian Rs. 2,00,000/- leh lawmpuina thuziak bakah PUC Branch-in Bible an hlan a, hemi hmalam hian Jeremy Lalrinnunga pawh chawimawina hun an lo hmang tawh a ni.

Niminpiah khan Mizoram-ah COVID-19 hri kai mi 129 hmuh belh niin nimin khan mi 109 te chu anmahni enkawlna hmun atanga chhuahtir leh an ni bawk.

Tunhnai ah Mobile phone apps hmanga loan pe thei anga insawi chungchangah mi tam takin harsatna an tawk a, Mizoram Police chuan mitin te fimkhur turin an ngen.

Mizoram-ah kum 1997 atanga kumin July ni 21 thleng khan Zu chhe in kaihhnawih (Spurious liquor related death) vanga thi mi 158 an awm a, hemi hunchhung a Zu chhe in kaihhnawih vanga thi tam ber kum chu 2017 niin mi 57 an thi a ni.

Mizoram-a damlo te natna neih zawng zawng atanga za zelah 55.5 chu natna inkaichhawn theihlo (Non-Communicable Diseases) a ni.

Principal Secretary, General Administration Department (GAD) Navin Kumar Choudhury chuan Mizoram District hrang hrang 11-a Deputy Commissioner te chu biakhmuh theihna hmanga Meeting neihpuiin hetiang Meeting hi thlatin neih tum a ni.

Inrinni kalta, August 20, 2022 khan khawvel hmun hrang hrangah ‘World Mosquito Day’ hman a ni a, he ni denchhen hian Serchhip District chhunga zirna In hrang hrangah Thosi seh atanga natna kai theih laka fimkhur a tul zia inzirtirna kalpui mek a ni.

Commonwealth Games neih zawh taka India tana Hockey (Hmeichhia)-a Bronze Medal latu Lalremsiami chuan a zirchhuahna Thenzawl-a SAI Hostel chu zankhat riakin a tlawh. Lalremsiami hian nizan hmasa khan Thenzawl hi thlengin SAI a awm mek leh thawktute chuan nizan hmasa vek khan lawmpuina hun an buatsaih a, Hostel-a awm mek te fuihna thu te a sawi bakah nimin zing khan Hostel-a awm te hi a practice pui nghal bawk a ni. Hemi hnu nimin khan Thenzawl-a a lehkha zirna hmun Govt. Thenzawl M/S mleh Govt. Lallengvunga H/S te pawh tlawhin heng hmun a tlawhna ah hian a Jersey te leh infiamna bungrua a hman te a hlan a, nimin khan Serchhip-ah rawn chawl zawkin chawhnu lamah Aizawl an pan leh nghal a ni.

Serchhip Sazuar Association te chuan nimin khan Serchhip Hmar Veng YMA Hall-ah Assembly neiin kum 2022-2023 chhunga hruaitu tur thlanna an nei a, President-ah Kapthianga (Chhim Veng); Vice President-ah F. Lalhma-ngaihzuala (Chanmari Veng); Secretary-ah Ramluahthanga (Serchhip Venglai); Asst. Secretary-ah C. Thangdawla (Dinthar Veng); Treasurer-ah Ramnunmawia (Bazar Hnuai) leh Fin. Secretary-ah H. Rodingluaia (Chhim Veng) te thlan an ni. He Assembly-ah hian hun hmasa lamah Report hrang hrang ngaihthlak niin an Member boral te sunna hun hman a ni bawk a, Rorelna neiin an pawl inkaihhruaina thil pawimawh te rel a ni.

Mizoram Upa Pawl (MUP) Serchhip District chuan niminpiah khan Serchhip Bazar-a an Office-ah Executive Committee thutkhawm neiin Serchhip Damdawi In OPD-ah kum upa te duhsak leh inentir tura an hming pawh lam hmasak thin nise an duh thu an sawi a, hei bakah hian hming ziahna pawh kum upa te tan a hrana siam sak nise an duh thu an sawi bawk. MUP Serchhip District hian MLA Fund hmanga Serchhip Bazar-a MUP Office chei thar lawmna neih pawh relin bialtu MLA Lalduhoma hovin September 13, 2022-ah hun hman turin an rel a ni. He hunah hian Adviser leh Executive Member thar te puangin pawm a ni a, Old Age Pension chungchanga hriat tur pawimawh te an inhrilh thar bawk a ni.

Mizoram-a tlawmngai pawl pakhat, Cod Nerc leh Bread for the World (BfdW) te hmalakna in nimin khan Serchhip-a Cod Nerc hnuaia Peoples Organisation te tan Food Processing Training neih a ni.

Nimin atang khan Serchhip-ah Health Department hmalakna in Golden Card siam leh Aadhaar thlunzawm runpui neih tan a ni.

Nimin khan Serchhip District-ah COVID-19 hri kai mi 7 hmuh belh leh niin mi 3 te anmahni enkawlna hmun atanga chhuahtir an ni thung.

Tun thla ni 29-a National Sports Day hman dan tur chu nimin khan S&YS Board Vice Chairman TC. Pachhunga hovin Directorate of Sports & Youth Services Conference Hall-ah sawiho a ni a, National Sports Day hmang tura hriattirna a chawpchilh deuh avangin State pum huapa hman theih a ni dawn lova, Aizawl khawpuiah hmun thlanchhuah thenkhatah hmang turin rua-hmanna siam a ni. National Sports Day hi kumtin August 29-ah hman thin niin Indian Hockey khel thiam hmingthang Major Dhyan Chand zahna lantir nan hman a ni thin a ni.

Aizawl North-II bialtu MLA Dr. Vanlalthlana chuan MLA Fund atanga a lei Computer leh Printer te chu nimin khan a bial chhunga School 12-ah a hlan a, a bial chhunga kum 2022-a High School leh Higher Secondary School atanga zirlai titha Top -10 a tling mi 3 (pathum) te hnenah Laptop a hlan bakah School 8 thawmthatna tur chu Aizawl North Development Society (ANDS) kutah a hlan bawk. Dr. Vanlalthlana chuan School tihchangtlunna tur a pek hian phutlet a nei tih sawiin, “Chu chu tun aia nasa zawka inpekna a ni,” tiin, “School hi hna zawng tura inzirtirna hmun ni lovin mahni ke-a ding thei tura inzirtirna hmun ah kan siam a ngai a ni,” a ti bawk.

School Education Department chuan Lung-sen H/S-a Zirtirtu nghet dah ngiata School khar hial a ni chu pawi an ti hle tih sawiin, he School a zirtirtu indaihlohna hriain sawrkar chuan SEDP hnuaiah Zirtirtu 3, Science leh Mathematics zir-tir thei tur telin a dahbelh tih an sawi a. Tunah hian he School-ah hian Zirlai 59 awmin Zirtirtu mi 7 an awm thu leh an zinga 2 chu Regular Teacher an ni a, tun dinhmunah hei aia tam zawk Zirtirtu dah chu a harsat rih avangin Lungsen khawtlang mipuite pawh hei hi hrethiamin zirna tha taka a kal theihna tura lo tawiawm tura beisei leh ngen an nih thu an sawi bawk a ni.

Nimin tlai thleng khan Mizoram-ah COVID-19 hri kai enkawllai mi 551 an la awm a, niminpiah khan hri kai mi 97 hmuhchhuah belh leh an ni.

Sialhawk khua in an tharchhuah Lakhuihthei (pineapple) kg 300 chu Dubai, United Arab Emirates (UAE) leh Bahrain-a hralh turin nimin zing khan thawnchhuah leh a ni.

Mizo Zirlai Pawl (MZP) buatsaih ni 2 awh 'Thu leh Hla Kutpui 2022' chu nimin khan chhunzawm leha zawhfel a ni.

Mizoram Sawkar Flagship Programme, Socio-Economic Development Policy (SEDP) hnuaia ‘Family Oriented SEDP’ chu Khawzawl District chhunga kalpui turin nimin khan hawn a ni.

Nimin khan Aijal Club-ah Tea Symposium neih niin Thingpui sawngbawl dan zirhona neih a ni.

Assam leh Mizoram-a ramri-in a tantlang District panga (5)-a Deputy Commissioner te chuan nimin khan Vairengte-ah inkawmna neiin heng District-a Superintendent of Police, Divisional Forest Office leh SDO(S) te an tel bawk a ni.

Mizoram atanga Tripura-a Bru tlanchhia, Tripura Transit Camp-a awm leh Tripura a inbenbel thlang zui ta zinga mi 5,009 te chu Tripura Electoral Roll-ah thun an ni tawh a, tun thlengin heng zinga mi 1,259 te chu Mizoram Electoral Roll atangin paih an ni tawh bawk.

Serchhip Police District Special Branch (DSB) te chuan nimin khan Serchhip Bazar Hnuai-ah Heroin No. 4 Hawng khat (gram 10.68) a rit chu an man a, a neitu nia hriat Lalpianruala@Maruala, Serchhip Bazar Hnuai pawh manin thubuai siam sak nghal a ni. Heng an damdawi man te hi tualchhung hralhna anga chhutin Rs. 30,000/- hu vel nia hriat a ni.

Election Commission of India thuchhuah angin, Electoral Roll-a hming chuang tawh te chuan, Form 6B hmangin mahni bial BLO emaw, AERO/ERO hnenah emaw, online-a Garuda App (Playstore atanga download theih) atangin Aadhaar leh Electoral Roll thlunzawm theih a ni a, hei hi tihluihna ni lovin mahni duh thlanna a tih tur a ni thung a ni.

Chhiahtlang Football Association buatsaih Malsawm Suzuki Cup Local Football Tournament chu nimin khan Chhiahtlang Chanmari Veng Khelmual-ah khelh tan a ni a, he Tournament ah hian Chhiahtlang atangin Football Team 6 an tel a, tun thla ni 27-ah zawhfel tura ruahman a ni. He Tournament hawnna inkhawm hi nimin khan Chhiahtlang Football Association President Laltlankima kaihhruaiin neih a ni a, he hunah hian Chhiahtlang North VCP C. Lalrawna leh Chhiahtlang South VCP R. Lalremchhunga ten thu an sawi a, hemi hnu hian match khelh zui nghal a ni.

Nikum (2021) chhung khan Serchhip District-ah TB vanga thi mi 4 awmin kumin chhungin mi 3 an thi tawh bawk.

Serchhip-a Excise & Narcotics Department chuan nizan hmasa khan Serchhip Sailiamkawn atanga Thenzawl panna kawngah Rakzu tam tham tak leh a neitu nia hriat te an man.

Nimin khan Serchhip District-ah COVID-19 hri kai mi 5 hmuh belh niin hri kai enkawllai mi 8 te chhuahtir an ni thung.

Nimin khan African Swine Fever (ASF) vangin Serchhip District-ah Vawk pahnih a thi leh a, heng te hi North Mualcheng leh Khawlailung-ah pakhat ve ve niin Khawlailung-ah hian Vawk pahnih suat a ni bawk a. Mualcheng khua ah hian ASF vangin Vawk 76 thiin 30 suat a ni tawh a, Khawlailung-ah Vawk 12 thiin 166 suat a ni tawh bawk. Nimin khan Khumtung-ah Vawk 25 te chu suat a ni bawk.

Nizan hmasa khan Saitual Police Team te chuan Saichal khaw kawngpuiah Myanmar kuhva bag 110 leh a neitu bakah lirthei khalhtute an man a, hei hi tunhnai ni 8 chhunga Mizoram hmun hrang hrangah dan lova tawlhruk Myanmar kuhva bag 505 manna a ni a, kar kalta khan Khawlzawl District chhung Tuipui khaw bulah Myanmar kuhva bag 265 leh Zawlnuam-ah bag 130 man a lo ni tawh bawk a ni. Hetihlai hian North Tripura-a Zampui Mizo Convention Youth Wing chuan khawchhak kuhva dan lova tawlh/a ruka phurh chu an duh loh thu leh an dodal zel tur thu thuchhuah siamin an sawi bawk.

Mizoram State Library, Art & Culture Department leh Raja Rammohun Roy Library Foundation (RRRLF) tangkawp chuan nimin khan Awareness Rally on Women Empowerment an buatsaih a, kumin 2022 hi Raja Rammohun Roy piancham kum 250-na niin a lawmnan RRRLF chuan kumin chhung hian India ram pum huapin Raja Rammohun Roy-a puala Programme hrang hrang buatsaih nise a ti a. Hemi atan hian RRRLF hian India ram District 250-ah Awareness Rally on Women Empowerment hi huaihawt turin hma an la a, Mizoram-ah chuan District 4 - Aizawl District, Kolasib District, Lunglei District leh Champhai District ah nimin khan hetiang hian hun hman a ni. Raja Rammohun Roy hi ‘Father of Modern India’ ti a sawi thin a ni a, khawtlang nun siamthat mai bakah hmeichhiate dinhmun chawisanna kawngah pawh theihtawp a lo chhuah tawh thin a ni.

Niminpiah khan Mizoram-ah COVID-19 hri kai mi 214 lai hmuh belh leh niin nimin khan hri kai enkawllai mi 205 te chu anmahni enkawlna atanga chhuahtir an ni thung.

Mizo Zirlai Pawl (MZP) General Hqrs. buatsaih 'Thu leh Hla Kutpui 2022' khuhhawnna chu nimin khan Aizawl-a Vanapa Hall-ah neih a ni.

Mizoram Pradesh Congress Committee (MPCC) Vice President Lal Thanzara chuan Kohhran mit tlung takin Inthlan an hmachhawn dawn tih a sawi.

Samagra Shiksha Executive Committee Meeting chu nimin khan an Chairman leh Chief Secretary Dr. Renu Sharma hovin Chief Secretary Conference Hall-ah neih a ni.

Mizoram District hrang hranga SIRD&PR hnuaia Master Trainer te tan ni 4 awh tur ‘Training of Master Trainers on Localization of Sustainable Development Goals’ chu nimin khan neih tan a ni.

HIV kai awlsam zawk tura ngaih te leh dinhmun hlauhawma ding mek te tana tanpuina (Harm Reduction programs) chak zawk leh nasa zawka kalpui dan tur sawihona leh inrawnkhawmna chu nimin khan Health Minister Dr. R. Lalthangliana hovin Assembly Annex Conference Hall-ah neih a ni.