Registration of Electors (Amendment) Rules, 2022 tichhuakin kalphung thar inhrilhfiahna neih a ni

Sawrkar laipui chuan Registration of Electors (Amendment) Rules, 2022 tichhuakin, he Dan siamthat vang hian Voter inziahluhna atana Form hman thin, Registration Forms te thlak danglam a ni a. Hei bakah hian Electoral Roll-a inziaklut duh te tan Electoral Roll-a intunluh dilnaa thehluh lawk theih a ni tawh dawn bawk a ni.

Special Summary Revision 2023 neih tur chungchangah nimin khan Joint Chief Electoral Officer David L.Pachuau hovin a Pisa-ah Political Party hrang hrang aiawhte inhmuhkhawmna chu neih a ni a, he hunah hian Joint CEO chuan Sawrkar laipui chuan Registration of Electors (Amendment) Rules, 2022 tichhuakin, he Dan siamthat a nih avang hian Voter inziahluhna atana Form hman thin, Registration Forms te thlak danglam a ni tih a sawi a. Section 23 of Representation of the People Act 1950 siamthat hmangin Electoral Roll a chuangte leh lut thar turte chuan Aadhaar Details an submit thei dawn a, Aadhaar Number hi March 31, 2023 hmain khawn zawh vek tur a ni, a ti a. Aadhaar thehluh nan Form thar, Form 6B hman tur tih sawiin Joint CEO chuan, ECI chuan Aadhaar thehluh hi mimal duhthlanna-ah a innghat a ni tih a sawi thu leh tihluihna a awm loh thu a sawi a. Aadhaar thehlut tur tan Online hmangin nvsp.in, voter helpline app hmang ten a thehluh theih bakah BLO kaltlang in a thehluh theih bawk thu a sawi a. Aadhaar neilo tan documents dang sawm leh pakhat (11) lai ECI Guidelines angin thehluh theih a awm a ni.

Modified Registration Forms thar hi tun thla, August 1, 2022 atanga hman tan niin Electoral Roll a inziaklut thar tur leh Constituency pakhat atanga Constituency danga insawn tur te tana Form 6 hman thin chu Electoral Roll-a inziaklut thar turte tan chauh hman theih a ni tawh dawn a, Electoral Roll-a chuang tawh te hming paihna atana hman thin Form 7 chu Electoral Roll a chuang tawh te hming paih nan leh chuang tura dilna kal mek te paih nan pawha hman theih a nih dawn bakah Form tharah hian mitthi tawh Electoral Roll atanga paih tur te tan Death Certificate thil tel a ngai dawn a. Electoral Roll-a mimal details, hming, address leh a dangte siamthat dilna atan a hman thin Form 8 chu Assembly bial danga insawn dilna atan te, Assembly bial pakhat hnuaia Part danga insawn dilna atan te, mahni details siamthat dilna atan te, EPIC tibo tan a thar dilna atan leh Electoral Roll ah PwD chhinchhiah nan hman a ni tawh dawn a ni.

Representation of the People Act 1950, Section 14 (b) siamthat a nih avangin, tun hmaa Electoral Roll a inziaklut turte tan Qualifying date pakhat (1st January) awm thin kha tih danglam niin Qualifying date pali (4)- 1st January, 1st April, 1st July leh 1st October a awm tawh dawn a, Annual Summary Revision erawh 1st January chauh qualifying date-a hmangin neih zel tur a ni ang. He ruahmanna thar ang hian kum leha kum tling thar tur (1st January, 1st April, 1st July, 1st October) zawng zawng ten a hma in Electoral Roll-a luh dilna an thehlut thei ang. Amaherawh chu, 1st April, 1st July, 1st October-a kum tling tur te chu heng quarter khata thla hmasa berah te hian an dilna te hi buaipui a ni chauh ang.

Hei bakah hian Recognized Political Party ten BLO puibawm turin Polling Station pakhat atan Booth Level Agent pakhat an ruat thei a, State Level-ah Party President emaw, Secretary in Form ID:BLA 1 hmangin BLA ruat chhawngtu tur District Representative a ruat thei bawk ang. Chung District Representative te chuan Polling Station pakhat atan BLA pakhat zel an ruat thei a ni.

BLA te hi ruat an nihna Polling Station-a Vote nei ngei an ni tur a ni a, Special Summary Revision chhunga BLO hnena dilna lut te hi an lo finfiah pui ve thin tur a ni a, amaherawh chu Roll a luh dilna form hi an dawng thiang lo thung. BLA ruat tawh chu Party lamin an thlak hma chuan an ni zui dawn a ni.