Kumin ah Serchhip District-a mi 2 in Mit an pe tawh

Kumin chhungin Serchhip District-ah mi pahnih ten an thih hnuah midang tan an Mit an pe tawh.
National Programme for Control of Blindness (NPCB) Serchhip District in tun thla ni 25 atanga thla thar September 8 thleng awh tur 'Eye Donation Fortnight' vawi 37-na an hman mek puala Inkhawm nimin-a Brilliant Higher Secondary School Serchhip-a neih ah he thu hi tarlan a ni a, thih hnua midang tana an Mit petute hi East Lungdar khua leh Mualcheng khuaa mi te an ni a, nimin-a Eye Donation Fortnight hmanna ah hian zirlai naupang 80 vel zetin an thih hnua midang tana an Mit pe tura thutiam an chhang bawk a ni.

Nimin-a Eye Donation Fortnight puala hun hman hi he School-a Lecturer Lalrinnunga Tochhawng chuan kaihruaiin he hun hmanpuitu Serchhip District Medical Superintendent leh NPCB-a District Programme Manager Dr. ZD. Lalmuanawma chuan mihring taksa peng hrang hrang zingah Mit (Eye) chu a pawimawh ber te zinga pakhat a nih thu leh Mit pawimawhna hrang hrangte a sawi a, taksa hrisel lohna leh chhan dang avangin kan Mit chu chhe thei a ni tih sawiin, hei vang hian Mit kan mamawh tawh loh hnu, kan thih hnuah kan Mit te midang ten tangkai taka an hman zui theih tura kan pek a pawimawh thu sawiin, kumin chhungah midang tana Mit pe Serchhip District-ah an awm chu lawmawm a tih thu a sawi a. Mit hrisel leh tha kan neih reng theihna turin kan Mit kan enkawl a pawimawh thu a sawi bawk.

Nimin a he hun hmanna ah hian NPCB Serchhip District-a Data Entry Operator KC. Lalbiaknia chuan he hun an hman chhan te sawiin, Serchhip District Hospital-a Opthalmic Assistant Zosangpuii chuan zirlai kalkhawmte chu Mit enkawl that a pawimawh zia leh Mit enkawl dan a zirtir a, zirlai naupangte hi a thlawnin an Mit enfiah sak an ni bawk.