COVID-19 hri kai enkawllai zat tlahniam hret

Pathianni khan Mizoram-ah COVID-19 hri kai mi 21 hmuh belh niin nimin khan hri kai mi 156 te anmahni enkawlna hmun atanga chhuahtir an ni.

Pathianni khan Mizoram-ah Rapid Antigen Test hmang chauhin Sample enfiah a awm a, Sample enfiah 54 atangin COVID-19 hri kai mi 21 hmuhchhuah niin Sample enfiah atanga chhutin za zela 38.89 te chuan hri an kai a ni. Pathianni-a hri kai hmuh belh te hi Lunglei District-ah 10, Saitual District-ah 6, Aizawl leh Champhai District-ah mi pahnih ve ve leh Mamit District-ah mi pakhat te an ni.

Nimin khan Mizoram District 11 atangin COVID-19 hri kai mi 156 te anmahni enkawlna hmun atanga chhuahtir an ni a, heti hian nimin tlai thleng khan Mizoram-a COVID-19 hri kai hmuhchhuah tawh chu 2,36,864 niin an zinga 2,35,711 te chu enkawl dam an ni tawh a, hri kai zingah za zela chhutin 99.51 te enkawl dam an ni tawh a, hri kai enkawllai mi 433 la awmin hri kai zingah mi 720 an boral tawh bawk a ni. Nimin tlai thleng khan hri kai enkawllai mi za aia tam awmna Aizawl District chiah a awm rih a ni.