Latest News

Thangpui P/S-a zirtirtu suspend lailawk a ni

Lunglei District chhung Thangpui khuaa Zirtirtu, naupang Uniform phelh saka puh chu nimin khan Department in Suspend Order a tichhuak a, Show Cause Notice pek a nih angin Lunglei South SDEO in a tanna hmunah a insawifiahna a ngaihthlak sak bawk.

Lunglei South Sub-Divisional Educational Officer (SDEO) sawi danin, Thangpui Primary School-a SSA Teacher, PC. Lalbiakengi chungchanga Department in enquiry a lakna chu a hmawr bawk fel thawkhat a ni tawh a, Show Cause Notice pek a nih ang leh Notice ah Insawifiah tura tih ni chu nimin kha a nih bawk avangin CJM Lunglei phalna in nimin khan a tanna hmunah a insawifiahna ngaihthlak leh Record a ni a, heng Report te hi Aizawl lama thuneitu sang zawk hnenah thawn leh nghal a ni, a ti bawk. PC. Lalbiakengi Suspend Order-ah hian With Immediate Effect tih niin, nimin atangin Suspend a ni, a ti a. He Order-ah hian thu leh awm hma atan suspend a nih thu leh suspend a nih chhungin hlawh a nei dawn lo tih tarlan a ni bawk.

Thangpui SSA Primary School-a zirtirtu man a nih avang hian nimin khan naupang nu leh pa te chuan an fate School an kal tir lo nia thudawn a ni a, an zirtirtu chungah an rin aia naa Dan in ro a rel avangin khawtlang nu leh pa te rilru a khawih hle nia a lan thu kan thudawnna chuan a sawi a, lungawi lohna lantir pawh ni lovin SSA Primary School naupang tumahin sikul an kal lo a ni.

Comments

Popular News (Last 30 Days)