Serchhip District-ah Thosi seh atanga inkaichhawn thei natna laka fimkhur a tul zia inzirtirna nei
‘World Mosquito Day’ hi kum 1897 atang khan August 20-ah hman thin niin kumin hian ‘Harness innovation to reduce the Malaria disease burden and save lives’ tih chu thupui ah hman a ni a. He ni pual hian Serchhip District Vector Borne Disease Control Programme (DVBDCP) chuan niminpiah khan Chhiahtlang P/S-I leh Govt. Chhiahtlang M/S-ah te hun hmangin nimin khan Chekawn leh Piler khuaa zirna In-ah hun hman chhunzawm leh a ni a, heng hunah hian District Consultant (Malaria) Lalchhuanawmi Khiangte chuan Thosi seh avang hian natna chi hrang hrang kai theih a awm thu sawiin, heng zingah hian Malaria chu kan ramah a langsar ber a nih thu a sawi a, hei bakah hian Dengue leh Japanese Encephalitis leh Chikungunya te pawh India ramah chuan a langsar tawh tih sawiin, Lymphatic leh Kala-Azar te pawh Thosi seh atanga inkaichhawn theih a ni tih a sawi a. Serchhip District-ah kumin chhung hian mi 15,736 te thisen enfiah atangin Malaria hrik pai mi 24 lai an hmuhchhuah tawh thu bakah Mizoram-ah ngei pawh a hmasa ber atan Japanese Encephalitis vei hmuhchhuah an nih tawh thu a sawi bawk a ni.
Thosi seh atanga kaichhawn theih natna laka kan him theihna tur hian kan In leh a vel kan vawnfai a pawimawh thu te, Thosi tui theihna tui tling awmlo tura tihfai a tul thu te, taksa khuh tam thei thawmhnaw inbel a pawimawh thu te, Zan mutna-ah Thosilen tha taka zar a tul thu te, Thosi hlo hmanga In leh a vel kah thin a pawimawh thu te an sawi a. Mi tu pawhin insawiselna Khawsik sang tak, Lu na, Ring khawng, Rilru fim lo leh vai ruai, Thakhur, Kaih leh Kut leh Ke zeng bakah Ruh chuktuahleh tihrawl na te, Mitmu na, Thak leh vual leh Ka leh Hnar atanga thi chhuak te an nei a nih chuan Thosi seh atanga kaichhawn theih natna vang a ni thei tih sawiin, damdawi thiam te pan vat thin a tul thu an sawi bawk a ni.
Comments
Post a Comment