Mizoram-a HIV Positive san lai ber 2018-2019 niin District zawng zawng hlauhthawnawm ah ngai

Mizoram-ah kum 2018-2019 kum kha HIV positive san lai ber a ni a, tunhnaiah tlemin ziaawm deuh angin lang mah se hri vei hian ziaawm lam a la pan thei lo.

Tunhnaia HIV kai awlsam zawk tura ngaihte leh dinhmun hlauhawma ding mekte tana tanpuina chak zawk leh nasa zawka kalpui dan tur sawihona leh inrawnkhawmna neihah he thu hi tarlan niin, Mizoram State AIDS Control Society (MSACS) hotute chuan Mizoram-a HIV inkaichhawnna tam ber chu mipat hmeichhiatna (sex) leh ruihhlo ti thin ten hriau an inhmantawm (IDU) atangin a ni tih an sawi a. Kum 2018-19 khan Sex atanga HIV kai mi 1,520 leh ruihhlo ti thinte atanga kai mi 907 an awm tih an sawi a. Drugs hluarna hmunah HIV inkaichhawng an pung zel tih pawh sawiin, Drugs hluarna hmun - Aizawl, Champhai leh Kolasib District chauh ni thinte kha District dang ah pawh damdawi a hluar chhoh zel avangin Mizoram District zawng zawng chu a hlauhawmna hmun ‘High Priority District’-ah a awm ve tawh niin an sawi bawk.

Mizoram State AIDS Control Society hotute chuan a vawi khatna atan Mizoram-ah kum 1990-a HIV positive hmuhchhuah a nih atangin HIV vei chu a sang zawngin a kal char char niin an sawi a. HIV veite chuan ART (Antiretroviral Therapy) damdawi ei thuai thei se an duh thu sawiin, hei hian mi dang laka HIV kai chhawn/kai darhna a tihniam thei tih an sawi bawk.

  MSACS thawktute chuan thalai kum 15 atanga 49 inkar bikah Mizoram chu India ram a HIV vei tamna ber a ni tih pawh sawiin, kum 15-49 inkar bikah hian India ramah chuan mi 10,000 zela 22-te HIV vei an nih laiin Mizoram-ah chuan mi 10,000 zela 237 (2.37%) chu hri vei an ni a, ram pum huap aia Mizorama HIV vei tamna hi a let 10-in a tam zawk niin an sawi bawk. Mizoram State AIDS Control Society thawktute chuan HIV darh zel loh nan theihtawp chhuah a pawimawh tih sawi bawkin, kum 2026-ah chuan HIV veite endawngna awm thin chu tihbo an tum tih an sawi bawk.