NH. 54 zauh mek-a harsatna awm te sawiho a ni

Aizawl leh Tuipang inkar National Highway-54 kawngpui zauh meka harsatna chi hrang hrang leh Rehabilitation & Resettlement kalpui dan tur chungchang chu nimin khan Revenue Minister Lalruatkima hovin sawiho a ni.

Revenue Minister Pisa-a he sawihona ah hian Land Revenue & Settlement Department hotute, Mizoram District tina DC, Addl. DC, Settlement Officer leh Revenue lam kaihhnawih Official te bakah National Highways & Infrastructure Development Corporation Limited (NHIDCL) hotute an tel a. He kawngpui zauh mekin a hrut khaw engemaw zat awmin heng khuaah te hian mahni chenna In chhuahsan ngai te, an eizawnna kalsana hmun dang-a eizawnna thar dap leh ngai te an awm a. Heng mite tan hian Rehabilitation leh Resettlement tih a ngaih dawn avangin District tin hotuten uluk takin zirchianna an kalpui a. He zirchianna assessment hi Mizoram Sawrkar dan Right to Fair Compensation and Transparency in Land Acquisition, Rehabilitation & Resettlement Act, 2013 hmanga neih a ni. He assessment atanga an thutlukna chu Mizoram Sawrkar Revenue Department chuan NHIDCL-ah thehlutin NHIDCL chuan Ministry of Road Transport and Highway-ah a thehlut ve leh a. MORTH hian NHIDCL hnenah JICA Project a nih anga assessment hi JICA Entitlement Matrix behchhana chhut turin a hriattir a. He Meeting-ah hian harsatna awm mek leh awm thei te, thu inhmulo lai te sawiho a ni.

He thutkhawm ah hian Right to Fair Compensation and Transparency in Land Acquisition, Rehabilitation & Resettlement Act, 2013 leh JICA Entitlement Matrix inanlohna te enho a ni a. District tinin harsatna an neih mek te pawh sawiho a ni bawk a. JICA Entitlement Matrix inkaihhruaina anga kalpui a nih dawn avangin Rehabilitation leh Resettlement dawng thei tur zat leh an sum hmuh zat tur pawh a danglam thei dawn tih tarlan a ni. Uluk taka sawiho a nih hnuah Mizoram puma hman tur Guideline thar, JICA Entitlement Matrix behchhanin Mizoram Sawrkarin siam se, chu Guideline an buatsaih chu Meeting-ah enho leh nise an ti a ni.

Comments

Popular News (Last 30 Days)

Serchhip DCSO sawn a ni