Mizoram-a Vote nei Bru 5,009 te Tripura E. Roll-ah thunin Mizoram E. Roll atangin 1,259 paih an ni tawh

Mizoram atanga Tripura-a Bru tlanchhia, Tripura Transit Camp-a awm leh Tripura a inbenbel thlang zui ta zinga mi 5,009 te chu Tripura Electoral Roll-ah thun an ni tawh a, tun thlengin heng zinga mi 1,259 te chu Mizoram Electoral Roll atangin paih an ni tawh bawk.

Mizoram Election Department hotute sawi danin tunhnaia Chief Electoral Officer (CEO) Conferene, Delhi a neih ah, CEO Tripura chuan Bru voters 5,009 te chu Tripura Electoral Roll-ah thun an ni tawh tih a tarlang a, Mizoram Election Department lam erawhin EROnet lamah Corresponding Deletion Eequest an la dawng tam lo a, an dawn ang chin chin te chu Mizoram Electoral Roll atangin an delete zel thin tih an sawi a. Mizoram Election Department in August ni 22, 2022 thleng a Mizoram Electoral Roll atang Bru voters an paih tawh zat chu 1,259 a tling tawh a, chungte chu Corresponding Deletion Request an dawn ang a paih te an ni.

Mizoram Election Department in Mizoram Electoral Roll atanga Bru an paih tawh te hi Mamit District chhung, Hachhek bial atangin 791, Dampa bial atangin 48 leh Mamit bial atangin 234, an vaiin 1,074 an ni a. Kolasib District chhung, Tuirial bial atangin 79, Kolasib bial atangin 29 leh Serlui bial atangin 67, an vaiin 175 paih an nih tawh bakah Lunglei district chhung, Thorang bial atangin mi 5 leh West Tuipui bial atangin 5, an vaiin mi 10 paih an ni tawh bawk a ni.

Mizoram Election Department chhin-chhiah danin Bru mi leh sa Mizoram chhunga vote nei te hi an vaiin 11,232 an ni a, Mizoram District-3 Mamit, Kolasib leh Lunglei District a vote nei te an ni a. Heng mite hi sawrkar laipui leh State pahnih sawrkar ten inbiakremna an neih hnuah Tripura-a inbenbel thlang te niin an tan hian ruahmanna hrang hrang siam a ni bawk a ni.