Ni 2 awh 'Thu leh Hla Kutpui 2022' zawhfel a ni

Mizo Zirlai Pawl (MZP) buatsaih ni 2 awh 'Thu leh Hla Kutpui 2022' chu nimin khan chhunzawm leha zawhfel a ni.

Aizawl Vanapa Hall-a 'Thu leh Hla Kutpui 2022' ni 2-na hi chawhma lamah Sports Minister Robert Romawia Royte chuan khuallian nia hmanpuiin Ram leh Hnam venhimna leh vawnhimna atana hmanraw pawimawh em em chu thu leh hla a ni tih sawiin, Lehkhabu chhiar hi kan uar thar a ngaih thu a sawi bawk. Nimin chawhnu lama hun hman chu Chief Minister Zoramthanga chuan hmanpuiin, “Thu leh Hla hi hnam anga min dinchhuah tirtu a ni a. Kan ti hausain kan ti hmasawn zel tur a ni,” a ti a, “Pathian in Zofate kan insuihkhawm nan leh kan inpumkhat nan Mizo tawng min dinchhuah sak a. Hma a sawn nasa hle a, chumi atan chuan mawh kan phur theuh a ni,” a ti bawk.

Nimin-a 'Thu leh Hla Kutpui 2022' ah hian chawhma lamah ziaktu lar B. Vanlalzari, C. Lalnunchanga, Prof. RL. Thanmawia leh B. Lalthangliana te kawmna hun hman a ni a, Chawhnu lamah MAL Book of the Year 1989 atanga 2021 thlenga dawng tawhte hnenah chawimawina thuziak hlan an ni bawk.