Chief Secretary in Lunglei-a Head of Offices te kawmin sawrkar hmalakna thenkhat a tlawh bawk

Mizoram Chief Secretary Dr. Renu Sharma chuan zan khat riak-a Lunglei tlawhin Inrinni khan Lunglei-a District Head of Offices te a kawm a, Civil Hospital Lunglei, Anganwadi, AH & Vety leh Fisheries hmunhma te a tlawh bawk.

Chief Secretary hian Zirtawpni khan Lunglei tlawhin Inrinni khan Lunglei DC Conference Hall-ah sawrkar Department hotute nen inkawmin Head of Office kalkhawmte chu District ti hmasawn tura mawhphurhna fawng vuantute an nih angin an hma zawn theuha tih tur awmte uluk leh taima taka thawk chhunzawm zel tur leh mipui hamthatna dah hmasa zel tur in a chah a. Office kal hun bi vawng uluka inkhuahkhirhna tha taka kengkawh tur leh an thawh chhan mipuite tana dawr nuam taka awm turin a chah a. An Project leh Scheme enkawlah te harsatna tawh chang te pawh a awm thei tih a hriatpui thu leh heng harsatna a thlenin sawrkar hotute hnenah thlen hreh lo turin a chah bawk a ni.

He hunah hian Lunglei District Bawrhsap Kulothungan A chuan Lunglei District dinhmun tlangpui leh sawrkar hmalakna langsar zualte sawiin, Lunglei District-ah Covid-19 dolet nan CSR tanpuina cheng nuai 200 hu chuang leh ambulance pathum (3) dawn te; zirlai harsa mi 46 tan Smartphone a thlawna pek te; ‘BALA (Building as Learning Aid) Anganwadi Centre panga (5) siam anih thu te leh ‘Go To The People Project’ kaltlanga thingtlang khaw kilkhawr zawka cheng te tan an khua ah ngei sawrkar service-te chhawpchhuah sak thin an nih thu te a tarlang a. Hemi bakah hian Department hrang hrang hmalakna lian tham leh Lunglei Municipal Council kalpui dan tur leh ni zung chakna hmanga power siam chhuah chungchang te sawiin, NH-302 Tlabung kawng laih meka kawng chhe nasa chu veiawm a tih takzet thu a sawi a, Chief Secretary chuan Lunglei DC chu helai contractor te meeting lo neihpui leh vat turin chah bawk a ni.

L:unglei SP Rex Zarzoliana Vanchhawng pawhin Lunglei District ah dan leh thupek kenkawh kawngah harsatna liantham a awmloh thu leh District ralmuang tak anih thu he hunah hian a sawi bawk a ni.