Nursing School CCCa bungrua rukchhuah a ni
Thudawn danin COVID19 hri kai te enkawlna tura sawrkar in a ruahman zinga Serchhip Districta lian ber Nursing School CCC hi niminpiah, August 18, 2022 khan misual ten an rawk tih hi hriatchhuah a ni a, helai hmuna Health Department in bungrua an dah Gas Stove leh Cylinder bakah tui hunna leh Dekchi dang te pawh a bo nual tih hriat a ni a, heng bakah hian Room hrang hrang kalhna te pawh tihchhiat niin helai hmun luah a nih dawn avanga Electric Wiring an siam te pawh tichhiain Electric wire tam tak a bo bawk nia hriat a ni.
He thil thleng hi hriat a nih hnuah Health Department chuan Serchhip Police Stationah FIR thehlutin Police te chuan thubuai an ziaklut a, misual te manchhuak tur hian hma an la nghal nia thudawn a ni.
COVID19 hri leng avanga Serchhip District in harsatna a tawh hnuah August 16, 2022 atang khan Nursing School CCC hi COVID19 hri kai te enkawlna atan hman tan a ni a, kumin a hri leng in ziaawm lam a pan hnu ah helai hmuna hri kai enkawl dam hnuhnung ber chu April 5, 2022 khan chhuahtir a ni a, hemi hnu hian CCCa hri kai enkawl an awm tak mai loh avangin June 2, 2022 khan Health Department chuan he buildinga bungrua an dah te chu tifelin bungrua te hi Roomah dahkhawmin an kalh fel a, niminpiah khan misual te hian rawkin heng bungraw hrang hrangte hi a bo tih hriatchhuah a ni ta a ni.
Nursing School CCC hi sak zawh a nih hnuah luah a nih mai loh avangin CCCa hman a nih hma pawh khan nasa taka suasam a lo ni tawh a, tuna luah a nih loh chhung hian helai hmun enkawl tur hian thawktu dah an awm chuang lo nia hriat a ni bawk.
Comments
Post a Comment