Supply Minister in LPG Connection semchhuak

Kolasib-a chhungkaw 89 te hnenah nimin zing khan Pradhan Mantri Ujjwala Yojana (PMUY) kaltlangin eirawngbawlna Gas Connection a thlawna pekchhuah a ni a, he hun hi Supply Minister K. Lalrinliana chuan a hmanpui a ni.

MIZOFED LPG Showroom-a LPG Connection pekna hunah hian Suppy Minister leh bialtu MLA K. Lalrinliana chuan LPG indaihlohna avanga harsatna mipuiin kan tawh thin te chu Sawrkar laipui hnenah thlen a nih hnuah hnianghnar zawk a kan dawn theih nan ruahmanna siam a nih thu leh chung ruahmanna avangte chuan hmasawnna hmuh chhoh mek zel a nih thu a sawi a. PMUY hnuaia hamthatna dawng Kolasib District chhungah thahnem tak an awm chu lawmawm a tih thu leh he Scheme in a tum tihlawhtling tur chuan hamthatna dawngtute an pawimawh thu a sawi. Thingtuah hmanga eirawngbawl tih tlem te, boruak thianghlim a awm theih nana ramngaw humhalh kawnga hmanraw tangkai a nih tur thu leh mei khu avanga hriselna a nghawng chhiat thin te sutkian nana he Scheme hi duan a nih thu a sawi bawk.

He hunah hian Mizofed LPG Manager Reuben K.Lalngaihzuala chuan Kolasib khaw chhunga chhungkaw 89 te hnenah PMUY kaltlangin LPG Connection hi pek a nih thu leh chhungkaw 200 bawr vel dawng leh tura ruahman mek a nih thu a sawi a, hamthatna dawngte hi Kolasib khawchhung leh pawnah chhungkaw 900 vel an awm tawh thu a sawi bawk.

Comments

Popular posts from this blog

Tukverh-a tlasual boral