Dr. C. Sangluaii ziak COVID-19 hri leng chungchang tarlanna lehkhabu Serchhip-ah tlangzarh a ni

Integrated Disease Surveillance Programme (IDSP)-a State Nodal Officer Dr. Pachuau Lalmalsawma chuan ‘Khawvel pumpui chawkbuaitu leh mi tam tak nunna suattu Coronavirus COVID-19’ tih lehkhabu Dr. C. Sangluaii ziah chu nimin khan a tlangzarh.
He lehkhabu tlangzarhna puala inkhawm tawi Hill View Guest House, New Serchhip-a neih ah Dr. Pachuau Lalmalsawma chuan COVID-19 hri leng avanga an hnathawhna leh he hri leng avanga Zoram mipuite tawrhna thlirlena tur lehkhabu tha tak chhawpchhuah a ni tur chu lawmawm a tih thu sawiin, an lehkhabu tlangzarh chu IDSP-a a thawhpuite hminga release anih theihna lai pawh a awm tih a sawi a. COVID-19 hri len vanglai-a a dona kawnga thawktute an buai thin dan leh thenkhatte phei chuan vauna hial te pawh an tawh dan te sawiin, Vawiin thlengin Pathian awmpuina an chan avanga tluang taka hna an la thawh theih thu a sawi bawk. IDSP State Nodal Officer chuan tunlai-a COVID-19 hri leng Vvariant hrang hrang chuangchang sawi langin, mipuite chu inthlahdah mai thei an la nihloh thu leh COVID-19 dona kawngah tanrual a pawimawh takzet tih a sawi a, hri leng in nunphung a rawn tlak danglam mila kan in herrem a pawimawh thu te pawh a sawi bawk.

He lehkhabu ziaktu, Govt. Serchhip College-a Principal hlui leh New Serchhip-a khawsa mek Dr. C. Sangluaii chuan COVID-19 hri len laia an hnathawna kawnga harsatna hrang hrang an tawh atanga a rilru a thil lo awm te chu ziak a dah ngei duhna atanga he lehkhabu a buatsaih chhoh dan a sawi a, tunhma in lehkhabu 17 lai a lo siam tawh thu leh a release-na hun chu Aizawl-ah hman thin anih thu te, tun tumah erawh an chenna hmun Serchhip-ah ngei tlangzarh nise tia ruahmanna an siam dan a tarlan bakah lehkhabu release anih theih nana kawng tam tak a puitu SEDAL te chungah lawmthu a sawi bawk.

Nimin-a he lehkhabu tlangzarhna puala inkhawm hi Govt. Serchhip College-a Asst. Professor K. Lalrinchhana chuan kaihruaiin he lehkhabu hi phek 186 a chhah, Bung 16-a then a ni a, a lehkhabu chhungah hian khawvel in COVID-19 alo hmelhriat chhoh dan te, Mizoram pawhin alo hmelhriat dan leh a lo luh dan te, nghawng hrang hrang a neih dante leh chhiatna a thlen dan te ziahlan niin, he hri leng atanga Mizo ten zirchhuah tur hrang hrang kan neih te leh hri len chhunga Mizoram chhunga thilthleng langsar thenkhat te leh chhinchhiahtlak te ziahlan a ni a, bu khaat hi Rs. 500/- man tura ruahman a ni.