Kohhran mit tlung takin Inthlan kan hmachhawn dawn - Lal Thanzara

Mizoram Pradesh Congress Committee (MPCC) Vice President Lal Thanzara chuan Kohhran mit tlung takin Inthlan an hmachhawn dawn tih a sawi.

MPCC Campaign Committee ruahman anga tunhnaia East Tuipui North Block huamchhung khaw hrang hrang an tlawhna ah Lal Thanzara chuan, kan sawrkar hrawn mek hian Mizoram mipui sum nasa takin an suasam niin a sawi a, “MNF sawrkarah mi rethei ten chanvo an nei ve lo. Mi pangngai rin an hlawh tawh lo. An mang a ang a, sum enkawl thiam loh vanga leiba tam tak rulhna atan midang pawisa puk chhawn leh ngaiin min siam mek a ni,” a ti.

Congress Party kalphung a danglam dawn tih sawiin MPCC Vice President chuan, “Congress party inbuatsaih thar zelah hian inthlan kan hmachhawn dan pawh nasa takin a danglam tawh dawn. Kohhran mit tlung takin Inthlan kan hmachhawn dawn a. Pu Lalsawta'n ‘That Loh Theih Lohna Bawm’ hmangin min hruai dawn. Tuna Chief Minister tura atana mi duhrawn ber leh rinhlawh Pu Lalsawta hmanga Pathian in min buatsaihna dan hi kan lawm hle a ni,” a ti a. “Tunah hian kan mithiamte nen Ram mipui leh Ram tana tha ber turin Policy uluk takin an duang mek a. NLUP hmangin Ram mipui rawng theihtawpin kan lo bawl tawh. Chumi hun chu a liam tawh a, tunah chuan mi taimate tanpuina tur, Tang Puihna chu kan kal pui dawn,” tiin, “Mizoram mipui tana sawrkar tha (Good Governance) That loh theih lohna bawm din a, mipui rilru siamthat (Moral reform) hi kan tum a ni,” a ti bawk.