Mizoram Assembly-ah NeVA hmang ve dawn

National e-Vidhan Application (NeVA) chu Mizoram Assembly-ah hman ve a ni dawn a, hemi chungchang zirhona ni 5 awh tur chu nimin khan Banquet Hall, Assembly Annexe-ah nimin khan neih tan a ni.

NeVA hi Digital Legislature leh Paperless Legislature tura hmalakna a ni a, NeVA website hi National Informatics Centre (NIC) design leh siam niin Ministry of Parliamentary Affairs, Government of India enkawlna hnuaia awm a ni a. NeVA thupui chu 'One Nation One Application' tih niin India rama Legislature te platform khata pawhkhawm chu a tum niin Cloud-based a ni a, Mobile-friendly tura buatsaih a ni bawk.

Nimin-a he training hawnna hi Assembly Deputy Speaker Er. Lalrinawma chuan hmanpuiin National e-Vidhan Application(NeVA) hi India ram State/UT zawng zawngten an hman tura ruahman a nih thu leh tunah hian State pali-ah hman tan tawh niin North-East ah chuan Nagaland-ah hman tan tawh niin, Mizoram Legislative Assembly chuan rahbi thar kai chho-in kan han hmang ve thei tur hi a lawmawm hle tih a sawi a, thawktute inpekna leh thawhrimna fakawm a tih thu a sawi a. A Project hi CSS Funding niin State sawrkar in zaa 1o tumin, DPR te thehluh a nih hnuah Mizoram tana sanction amount chu Rs. 8,70,84,750/- a ni tih a sawi a. Tunah hian First installment UC thehluh a nih tawh thu leh Second Installment beisei mek a ni tih a sawi bawk.

NeVA hmang hian information hrang hrang - Notices, Bulletins, Rules of Procedure, List of Business, Starred/Unstarred Questions with answers, Bills, Paper laid, Committee report leh a dang dangte a tih theihin a hmuh theih dawn a. Assembly Question te leh a dangte pawh NeVA hmang hian a thehluh theih dawn a ni. He hmalakna ah hian Member-tin dawhkan-ah Touchscreen vuah vek a ni ang . House chhungah Paper sem awm tawh loin member ten an duh ang an hmet chhuak tawh mai dawn a, Member-te House chhunga thusawi rei zawng te pawh a lo in record vek dawn a ni.

Assembly Member-te dawhkan tina touchscreen dah a nih bakah hian mimal taka hman tangkai tur ipad member tinte hnenah pek vek a ni a. He ipad hmang hian member-te Constituency-a an awm lai emaw, khawi atang pawhin Assembly/Session business tluang taka an lo kalpui a an lo hriat ve theih beisei a ni bawk.