Serchhip District Hospital engti kawng zawng maha sawnchhuah kan rem ti lo tih hi kan dinna a ni - JAC

JAC on Serchhip District Hospital Site hruaitute chuan Serchhip District Hospital building thar sak tur chungchangah an pawl Executive Meeting in rel angin, “Engti kawng zawng maha sawnchhuah hi kan rem ti lo tih hi JAC dinna a ni,” an ti a. Hospital sakna tura CSR Fund hmuh chu a lapse a nih chuan an thiamloh a nih loh thu an sawi bawk.

JAC on Serchhip District Hospital Site te hian Serchhip District Hospital sak tuma hmalak mek chungchangah nimin khan an Chairman Kapliana Pachuau hovin Serchhip Press Club-a thuthar thehdarhtute kawmin an hmalakna te an sawi a, he hunah hian Serchhip District Bawrhsap hova JAC leh NGOCC hruaitu ten inkawmna an neih tuma Hospital building thar chungchanga an pawm theih tur an lo sawi chungchanga zawhna chhangin JAC on Serchhip District Hospital Site hruaitute chuan, Chief Minister in Hospital atana vbc. 13 pek thu kumin July 25-a a lo sawi tawh chu RTI hmanga an umzui thu leh July 29-ah chhanna hmuin hetah hian vbc. 13 lo kal tura ngaih chu Mizoram sawrkar RBI Account-ah a lo la thleng chiah lo tih an sawi a. Chuvang chuan an dinhmun tichiang tura Executive Meeting in an ngaihtuah thu leh chutah chuan ‘Engti kawng zawng maha sawnchhuah kan remti lo tih hi JAC dinna a ni’ kan ti leh ta a ni, an ti a. A hmun ngaia sak a nih loh dawn chuan a tawp kan thleng ang tih chu Committee thu a nih thu an sawi bawk a ni.

Serchhip District Hospital thar chu DPR anga a hmun ngaia sak thuai a nih theih nana Health Department laka PIL File an tum chu kaltlangpui ngei an tum thu leh tunah hian an inpeih tep tawh tih an sawi a, NGO leh VC hrang hrang atanga Supporting Document an neih, Resolution ‘Serchhip District Hospital hi a hmun ngai ah ngei sak that leh kan duh e’ tih chu Village Council 10-ah 8 in an sign sak thu leh YMA Branch 7 in an sign sak thu te, MHIP Branch 11-ah 10, MUP-ah Branch 11-ah 10 in an sign sak thu bakah NGO dang, Welfare neuh neuh te pawhin an sign sak thu an sawi a. Heng bakah hian hemi atana tul DPR an neih tawh thu leh MoU chu RTI hmanga an dil leh mek thu sawiin, PIL an thehluh tur chu sawrkar in thu tihtluk nuam a tih nan leh sawrkar puihna ang lek leka ngaih theih tur zawka File an tum thu an sawi thu an sawi a. Chutihrual chuan sawrkar in a hmun ngaia sa tura chak taka hma a la nghal a nih chuan an hnuhkhir thuai tur thu an sawi bawk a. PIL thehluh avanga sawrkar hmalakna muang palh thei chungchangah Public Interest a nih avangin rial rei lo tura an ngaih thu an sawi bawk a ni.

Tlawmngai pawl leh VC te ngaihdan an lak chungchangah Chhiahtlang leh New Ser-chhip an lak tel loh thu sawiin, an duhloh sa an rin thu pawh thuthar thehdarhtute zawhna chhangin an sawi a. Amaherawh chu Village Council chu tehkhawng ah an hman ber thu sawiin, Serchhip Town-ah VC 14 a awm thu leh chung zinga 8 te chuan an thlawp chuan a tam zawk duhdan a ni hrim hrim tih chu an innghahna a nih thu an sawi bawk.

JAC hruaitute chuan damdawi In sak tur chungchang kaihhnawih chu RTI hmangin an dil chhuak deuh vek tawh nia an hriat thu pawh sawiin, DC in a hmun lo tifel tura NGOCC a tihna chu ziaka a awm an hre chiah lo tih an sawi a. Sawrkar chu mipui tam zawk duhdan, mipui tam zawk tana tha tur anga hma la tura an beisei thu pawh sawiin, hetiang a ni chunga Hospital sakna tura CSR Fund hmuh hi hmang thei lova a lo lapse a nih pawhin an (JAC) thiamloh ni lovin sawrkar in mipui tam zawk duhdan ngaichang lova hma lak luih tlat a tum vang leh sawrkar kut-ah an ngaih dawn thu an sawi a. “Kan duhna te sawrkar te pawhin a ti hlawhtling thuai turah kan ngaiin kan beisei tlat a ni,” an ti a ni.

Nimin a thuthar thehdarhtute an kawmna ah hian an Chairman bakah Secretary Lalbiak-dika leh Lalnunsiama Pachuau te an tel a ni.

Comments

Popular posts from this blog

Tukverh-a tlasual boral