CWG-a Medal la Mizo infiammi te chawimawi

Commonwealth Games 2022 Birmingham-a neih zawh taka Mizoram atanga Gold Medal latu Jeremy Lalrinnunga chu Mizoram sawrkar chuan cheng nuai 25 pein Bronze Medal la tu Lalremsiami pawh cheng nuai 7.5 pek a ni.

Mizoram sawrkar chuan Commonwealth Games 2022 Birmingham a neih zawh taka India aiawha kal zinga Weightlifting kg. 67 Category-a Gold Medal latu Jeremy Lalrinnunga leh Women's Hockey-a Bronze Medal latu Lalremsiami te chawimawina hun Zirtawpni zan khan Aizawl Vanapa Hall-ah a buatsaih a, he hunah hian lawmpuina hi hlan an ni a, he hunah hian Chief Minister Zoramthanga chuan Medalist te pahnih a lawmpuina leh an hlawhtlinna chu ropui a tih thu sawiin, hlawhtlinna chang tura an beihna leh tumruhna leh an chhungte tawiawmna chu fakawm a tih thu a sawi a. Kan nih theih, kan potential thleng tur chuan tumruhna nen theihtawp chhuah a, theihna kan nei tih inhre chunga ke pen a pawimawh thu a sawi bawk.

He hun hi Sports & Youth Services Secretary Dr. Lalrozama chuan kaihruaiin Home Minister Lalchamliana chuan tun tuma Mizo medalist te pahnih chu an thalaipuite tana entawn tlak an nih thu a sawi a. Sports & Youth Services Minister Robert Romawia Royte pawhin Mizoram sawrkarin Sports chawisan ngaipawimawhin, thalaite mamawh phuhrukna tur theih ang ang - hmasawnna ruhrel din kawngah leh kawng danga theihtawp chhuah a nih thu a sawi bawk.

He hunah hian Bronze Medalist Lalremsiami (Hockey Player) leh Gold Medalist Jeremy Lalrinnunga (Weightlifter) te pawhin thu sawiin, Zothankimi, Hockey Mizoram President leh Lallianthuama, Mizoram Weightlifting Association President ten medalist te hlawhtlinna kalkawng an sawi bawk a ni.

Comments

Popular News (Last 30 Days)

Serchhip DCSO sawn a ni