COVID-19 enkawllai 17 awm

Serchhip District-ah nimin tlai thleng khan COVID-19 hri kai enkawllai mi 17 an awm mek.

Inrinni khan Serchhip District-ah COVID-19 hri kai mi pakhat hmuhchhuah niin North Vanlaiphai khua a ni a, nimin khan hri kai mi pakhat hmuh belh leh ni bawkin Serchhip Bazar Veng a mi a ni thung. Inrinni khan Serchhip District-ah hri kai enkawl dama chhuahtir an awm loh laiin nimin khan mi 10 lai anmahni enkawlna hmun atanga chhuahtir an ni a, Serchhip Hmar Veng a mi pahnih leh Chhim Veng-a mi pakhat bakah Thenzawl atangin mi 3, Khawlailung atangin mi 2, East Lungdar leh North Vanlaiphai atangin mi pakhat te chhuahtir an ni.

Heti hian nimin tlai thleng khan Serchhip District-a COVID-19 hri kai hmuhchhuah tawh chu 14,462 niin an zinga 14,410 te enkawl dam an ni tawh a, hri kai hmuhchhuah atanga chhutin za zela 99.64 te enkawl dam ni tawhin hri kai enkawllai mi 17 an la awm a, hri kai te zingah mi 35 an boral tawh bawk a ni.

Serchhip District-a khaw 4-ah COVID-19 hri kai enkawllai la awmin an zinga mi 9 te chu Serchhip khua niin P&E Veng-ah 4, Bazar Veng leh Medical Quarters-ah mi pahnih ve ve leh Zozam Veng-ah mi pakhat te an ni a. North Vanlaiphai-ah hri kai enkawllai mi 5 awmin East Lungdar, Khawlailung leh Mualcheng-ah hri kai enkawllai mi pakhat theuh an awm bawk a ni.