Latest News

Thingpui sawngbawl dan zirhona neih a ni

Nimin khan Aijal Club-ah Tea Symposium neih niin Thingpui sawngbawl dan zirhona neih a ni.

India Formasa, Angel Business Promoters leh Tharthilthlentu (TiLi) buatsaih Tea Symposium hawnna hun hi Deputy Chief Minister Tawnluia chuan hmanpuiin Mizoram-a thingpui chingtute leh Agriculture-a innghat loneitute hmasawnna tur kawng ngaihtuah tura Taiwan atanga lo zin National Chung Hsing University Professor te leh zirlai te chungah lawmthu a sawi a. A bik takin thingpui chingtute tan an tharchhuahte Taiwan thingpui tha mi - Premium Brand ang tluka sawngbawl dan tur ngaihtuahpuia thawhhona tha tak an nei thei tur chu lawmawm a tih thu a sawi bawk.

Taiwan atang hian kum 2019 khan mithiamte lo zinin Mizoram atanga tharchhuah thingpui fe zirchiang turin an ram-ah an hawn a. Anmahni sawngbawl dan anga sawngbawlin man to zawka hralh theih turin an siam chhin a. Tun tumah hian an hmalak tawhna te bawhzui tura lo kalin thingpui tharchhuah tamna khua Biate, Darzo leh Reiek te fanpui an ni. Tea Industry chauh ni lo Agriculture-a innghat Industry dangah pawh thawhho theih dan kawng dap a nih tur thu Formosa Foundation India Chapter Chairman Jonathan Lalremruata chuan a sawi bawk.

Nimin-a he hun hman hi TiLi CMD LTL Fela’n a kaihruai a, Mizoram sawrkar Horticulture Department hotute, Central YMA leh AMFU hotute, Mizoram chhunga Agro-Based Entrepreneurs te bakah Sialhawk Lakhuihthei chingtute an tel a. Taiwan Tea Ceremony en ho a nih bakah Taiwan Tea Industry thanlen dan ngaihthlak niin Mizoram leh Taiwan-in Agriculture sumdawnna kawnga thawhhona an neih theih dan turte sawihona hun an hmang a ni.

Comments

Popular News (Last 30 Days)