Kawn Veng Biak In hawng

Cheng nuai 99 chuang senga sak Presbyterian Church of India Chhiahtlang Kawn Veng Kohhran Biak In chu Inrinni khan Mizoram Synod Executive Secretary (Sr) Rev. C. Zorammawia chuan a hawng a, Biak In thar lawmna puala inkhawm Bialtu Pastor Rev.C. Lalsanglura kaih-hruaia neih ah Rev. C. Zorammawia hian thuchah a sawi nghal bawk a, he hunah hian Kohhran mipui thahnem tak an tel a ni.

Report atanga a lan danin Chhiahtlang Kawn Veng Kohhran Biak In hawn tak hi sawi-khawm hnua Biak In 4-na niin Nov. 28, 2012 khan a sakna tur lungphum phuma sak hna tan nghal a ni a, a dung ft. 89 leh a vang ft. 40 niin mihring 410 leng tura duan a ni a, ft. 18-a zau Gallery siam a ni bawk a, August 16, 2014 khan luah tan a lo ni tawh bawk a ni.

Chhiahtlang Kawn Veng Kohhran hi Nov. 16, 1916-a din niin Kohhran chhungkua 118-ah member 555 an awm mek a, Dan zawhkim 435 awmin Kohhran Upa 8 leh Tual Upa 2 an awm mek bawk a ni.