Mizoram-ah inkaichhawn theihloh natna tuartu tam

Mizoram-a damlo te natna neih zawng zawng atanga za zelah 55.5 chu natna inkaichhawn theihlo (Non-Communicable Diseases) a ni.

Mizoram sawrkar Health & Family Welfare Department hnuaia World Bank sum hmanga mipuite hriselna tihchangtlunna project kalpui mek. Mizoram Health Systems Strengthening Project (MHSSP) thuneituten nimin khan Aijal Club-ah natna inkaichhawn theihloh (Non-Communicable Diseases) leh Health Insurance chungchanga khawtlangin hma an sawn theih dan turte, a bik takin mipuiten hemi kawngah engtin nge inzirtirna leh inhrilhhriatna tha an neih theih ang tih duanchhuah nan inrawnkhawmna StakeHolders’ Consultation Meeting an neih ah he thu hi tarlan a ni a, he hunah hian zirchianna neih tawh atanga a lan danin Mizoram-a damlo te natna nei zawng zawng zinga za zelah 55.5 chu natna inkaichhawn theihloh - Cancer, Zunthlum, Thisen Sang, Lung natna leh adangte, Non-Communicable Diseases an tih te a nih thu tarlan a ni bawk.

He hunah hian Mizoram Health Care Scheme (MHCS) leh Pradhan Mantri Jan Arogya Yojana (PMJAY) Mizoram-a kalpui a ni chungin hemi chungchang hrelo mipui hi an la awm nual tih pawh tarlan a ni bawk.

Inrawnkhawna hi MSHHP Project Director Dr. Eric Zomawia’n kaihruaiin Project in mipuite hriselna tihchangtlun kawnga hma a lak tum dan tlangpui te tarlangin, inrawnkhawmna hian rah tha tak, mipui zirtir leh inhrilhhriat kawng ah a chhuah ngei a beisei thu a sawi a. He huna Kalkhawmte chu Group hrang hrangah inthenin Mizoram chhunga natna inkaichhawn theih loh (Non-Communicable Disease) vei zat tihniam thei tura mipuite hnena inzirtirna pek dan tur kawng leh Health Insurance-a hma kan sawn theihna tura thil tangkai tur te an sawiho a ni.