Tlawng tui lak hna kal mekah 92% zawh a ni tawh

SIPMIU in Aizawl khawpui chawmtu tur Tlawng lui tui lakna hna an thawh mek ah sum vbc. 200 bawr vel sen a ni tawhin hna 92% vel zawh a ni tawh.

Chief Secretary Dr. Renu Sharma chuan Zirtawpni khan Tanhril Setlak ram-a UD&PA hnuaia SIPMIU hmalakna, Augmentation of Water Supply and Construction of 37 MLD Water Treatment Plant chu a hmunah tlawhin hnathawh dan leh project dinhmun a en a. SIPMIU Project Director Lalrothanga chuan project chungchang hi sawifiahin Tlawng lui atanga tui pump chu tih thianghlim a nih hnu ah Laipuitlang a pump thlen tur a ni a, kum 2033 thleng a Aizawl khawpui tui mamawh phuru tura ngaih a ni tih a sawi a. Setlak atang hian tui pipe phum niin tunah hian Vaivawkawn - Hunthar leh Hunthar - Chanmari West ah metre 200 vel phum tur ala awm niin a sawi.

37 MLD Water Treatment Plant hi Aizawl khawpui tana tui thianghlim lakna tur hmun thar niin Aizawl hmarlam Veng hrang hrangte chawm tura duan a ni a. Aizawl Greater Water Supply Scheme Phase I&II aiin a tui pump chhuah theih zat a tam zawk a. Phase I&II hian nitin tui thianghlim litre maktaduai 28 atanga 34 bawr vel a pump chhuak thei a, 37 MLD Water Treatment Plant hian nitin tui thianghlim litre maktaduai 37 pump chhuak thei tura ruahman a ni. Helai hmun hi peihfel a niha hman theih hunah chuan Aizawl khawpuiin tun aia let hnih a tamin tui thianghlim a hmu thei dawn a, ram pum huapa mi pakhatin nitin tui thianghlim a dawn tur zat bituk litre 135 hmu thei tura duan chu a takin a hlawhtling thei dawn a ni.

Comments

Popular posts from this blog

Tukverh-a tlasual boral