PMAY-U hnuaia Serchhip-a 2nd DPR-a tel te tanpuina tur thawhkhatna pek kim an ni tawh
Serchhip-a UD&PA Department hotute hnen atanga thu kan dawn danin Serchhip District chhung khawpui a cheng In neilo te tana In sak tanpuina, Housing For All-Urban Pradhan Mantri Awas Yojana-Urban (PMAY-U) kalpui mekah hian 2nd DPR-a tel, tanpuina dawng thei tura thlanchhuah mi 937 te hnenah hian tunhnai khan an sum dawn tur atanga a thawh khatna, Rs. 60,000/- chu pekchhuah a ni a, heng mi 937-ah hian 2nd DPR-a tanpuina dawng turte chu an tel kim vekin tanpuina dawng tura lo thlan tawh, inhnukdawk leh chhan dang avanga dawng thei lo te chu he DPR atang hian paih an ni a, heng In sak tanpuina dawngtute hi an hmalak dan enfiah a nih hnuah a tahtawlin tanpuina an dawn tur hi pek chhoh zel tur a ni dawn a ni. Tunhnaia India Independence Day lawmna Serchhip a neih ah khan PMAY-U atang hian Serchhip khawpui chhungah chhungkaw 404 te hnenah In sak tanpuina Rs. 1,50,000/- theuh pek an nih thu leh tunah hian chhungkaw 341 te chuan In thar an neih tawh thu tarlan a lo ni tawh a, Thenzawl leh North Vanlaiphai-ah chhungkaw 121 ten In sakna sum hi an dawng tawh tih tarlan a ni bawk.
Hetihlai hian 3rd DPR-a tel, Bank Account detail thehlut tura tunlaia tih mek te tanpuina dawn hun tur erawh sawi theih ala ni lo nia thudawn a ni a, tanpuina sem dawnah Bank Account lo dik lo leh hman theih loh te a awm thin avanga lo enfiah nawn tura tih an nih anga he hmalakna hi kalpui an nih thu Department-a thawk te chuan an sawi bawk.
BJP Serchhip District chuan HFA-U dawng tura hming tarchhuah te hi an lawmpui thu thuchhuah siama tarlangin, Central Sawrkarin a ngaih pawimawh em em, khawpuia In neilo ten chenna In an neih ve theih nan leh Insak tanpuina hi a hmu awm tak tak ten an hmuh ve ngei theihna tura hmala chho zel tura Sawrkar an ngen thar leh bakah, Central Scheme hrang hrangte chu a nihna ang taka kalpui turin sawrkar an ngen thar leh tih an tarlang bawk. Hei bakah hian PMAY-U Award-2019 a beneficiary tam tak In sa zo tawh anga lang leh a taka pawisa an dawng si lo te chu mak an tih thu pawh BJP chuan sawiin, an manganna leh mamawhna sutkian thuai a nih theih nan chak taka hma la turin sawrkar chu an ngen bawk.
Comments
Post a Comment