Serchhip District-a BLO ten Electoral Roll-a inziahluh dan kalphung thar an zirho

Sawrkar laipui in Registration of Electors (Amendment) Rules, 2022 a siam thar chu hman tan a nih tak avangin Serchhip District chhunga Booth Level Officer (BLO) te tan hemi chungchang zirhona hi nimin khan Serchhip-ah neih a ni a, hemi kaihhnawiha a Form siam thar hrang hrangte fill-up dan chu a tak anga tihchhin a ni bawk.

Serchhip District chhunga BLO te tana Training Serchhip DC Conference Hall-a neih hi Serchhip District Addl. DC leh Deputy District Election Officer Lalmuansanga Ralte chuan hmanpuiin India ram chu inthlang ram kan nih avangin inthlan kaihhnawih thil chi hrang hrangte chu a pawimawh thu a sawi a, he huna tel BLO te chu mipui ten kan aiawha roreltu tur thlang tura Vote kan thlak theih nana a bulthut a thawktu an nih avangin an pawimawh hle tih sawiin, Vote thlak thei turte Electoral Roll-a an inziahluh theihna tur leh inthlanna ah Vote nei ten Vote an thlak theuh theihna tura thawktu an ni tih a sawi a, Serchhip District chuan inthlanna hrang hrang felfai taka a lo kalpui tawh thu leh heng te hi BLO te, thawktu hrang hrangte leh mipuite thawhhona leh tanrualna vang a nih thu a sawi a. Inthlanpui buaipuina kawngah kalphung leh kaihhruaina thar te siam zel a nih avang leh heng te hi hman nghal zel a tul thin avangin hetiang atana Training buatsaih te chu hman tangkai tum turin a chah bawk. Deputy DEO chuan Serchhip District chu Mizoram laili-a awm a ni tih sawiin, hei vang hian inthlan kaihhnawiha hmalakna hrang hrangah hmun tam taka harsatna thleng ang thin te kan tawk ve ngai lo tih pawh sawiin, kan vanneih hle tih a sawi bawk.

Nimin a BLO Training hi Serchhip Election Officer Lalrinchhani Ralte chuan kaihruaiin India ram-a Electoral Roll siamthat hna thawh thin ah inziahluhna tura kalphung siam thar a nih thu sawiin, tun hma lama Electoral Roll a inziaklut turte tan Qualifying date pakhat (1st January) awm thin kha tih danglam niin Qualifying date pali (4)- 1st January, 1st April, 1st July leh 1st October a awm tawh dawn tih a sawi a, Annual Summary Revision erawh 1st January chauh qualifying date-a hmangin neih zel tur a ni tih sawiin, he ruahmanna thar ang hian kum leh-a kum tling thar tur (1st January, 1st April, 1st July, 1st October) zawng zawng ten a hma in Electoral Roll-a luh dilna an thehlut thei anga, 1st April, 1st July, 1st October-a kum tling tur te hi heng quarter khata thla hmasa berah te hian an dilna te hi buaipui a ni chauh dawn a. Kumin ah hian Draft Electoral Roll chu November 9, 2022-ah tarchhuah a ni dawn tih pawh a sawi bawk.

BLO te tana Training nimin-a neih ah hian chawhma lamah Tuikum Bial-a AERO F. Lalnisai SDC sawrkar in Electoral Roll-a inziahluh leh siamthat dawna dilna kalphung a siam thar hrang hrangte chu he huna tel BLO te a zirtir a, chawhnu lamah Serchhip Election Office-a Data Entry Operator V. Laltlanmawia chuan Online hmanga Form fill-up dan hrang hrangte zirtirna pe bawk.

He huna tarlan a nih danin Section 23 of Representation of the People Act 1950 siamthat hmangin Electoral Roll a chuangte leh lut thar turte chuan Aadhaar Details an submit thei dawn a, Aadhaar Number hi March 31, 2023 hmain khawn zawh vek tur a ni a, hemi atana hman tur Form thar, Form 6B chungchang leh Aadhaar thehlut tur tan Online hmangin nvsp.in, voter helpline app hmang ten a thehluh theih bakah BLO kaltlangin a thehluh theih bawk thu tarlan a ni a. Aadhaar neilo tan documents dang sawm leh pakhat (11) lai ECI Guidelines angin thehluh theih a awm bawk.

Serchhip District-ah hian Assembly bial pathum (3) awmin Polling Station 85 a awm a, heng ah hian BLO pakhat zel awmin 26-Serchhip AC-ah BLO 29; 27-Tuikum AC-ah BLO 30 leh 28-Hrangturzo AC-ah BLO 26 an awm a ni.