Sialhawk thar Lakhuihthei Dubaiah thawn dawn

Sialhawk khua in an tharchhuah Lakhuihthei (pineapple) kg. 230 chu Dubai, United Arab Emirates (UAE)a hralh turin nimin zing khan Deputy Chief Minister Tawnluia chuan Aizawla Horticulture Directorate kawt atangin a vailiam.

Hemi puala inkhawm tawi neih ah Deputy Chief Minister Tawnluia chuan Sialhawk khuaa lakhuihthei chingtute hlawhtlinna a taka hmuh theiha a awm ta hi an taimakna leh tumruhna bakah khawtlang an tanrualna rah a ni tih sawiin, a bial chhunga kuthnathawktute hnenah hralhchhuah tham an tharchhuah phawt chuan a hralhna tur an hmuh ngei ngei nan theihtawp a chhuah ang ti a chona a siam thu a sawi a. Tualte Tomato chu Assam lamah hralhchhuah a nih tawh thu leh Sialhawk Lakhuihthei pawh Assam leh Meghalayaa hralh a nih bakah India rampawn, Dubai (UAE)ah hralh a ni dawn ta tih sawiin, Doha (Qatar) leh Bahrainah pawh thawnchhuak turin an inbuatsaih mek tih a sawi a. Thlai leh theirah te a hlawma chin (cluster approach) a bial chhungah an kalpui thin chu lawmawm a tih thu sawiin, Lakhuihthei pawh Sialhawk mai bakah a chhehvel khua ten an ching a, a hlawma chin hian a hralhna tur zawn kawngah leh Department lam atanga vil kawngahte, thil dang dangah a tangkai bik hle a ni, a ti.

Horticulture Department Secretary K. Lalthawmmawia chuan tun tuma Sialhawk Lakhuihthei Dubaia thawnchhuah hi a enchhinna a nih avangin a tam thamin thawnchhuah a la ni rih lo tih he hunah hian sawiin, Dubai lamin an duhzawng a nih chuan a hlawm tam zawka thawnchhuah leh zel tur a ni tih a sawi a, tun tuma an hralhna rate kg khat Rs. 30/ chu a phurhna nen chhutin a hniam an tih pawhin, a bultanna tur a nih vangin hloh huamin hmalak phawt a nih thu a sawi bawk.

Sialhawk khua hian kum 2002 atang khan Lakhuihthei hi an ching a, a chhehvel khua Chalrang leh New Chalrang pawhin ching ve nghalin, Sialhawk khuaah hian kum kalta khan chhungkaw 320 in Lakhuihthei huan an nei a, an tharchhuah hi quintal 6400 niin Rs. 95,00,000/ vel an leichhuak a. Kumin ah hian a lo berah quintal 10,000 vel thar chhuah an inbeisei a ni.

Dubaia Lakhuihthei hralhchhuak tur hian Fair Exports (I) Pvt. Ltd. (A Division of Lulu Group International) te nen in biakremna neiin, anni hian Mumbai Airportah Kg. ah Rs. 30/ hisapin an lo leisak dawn a, Thlawhtheihna a inthawn turin ruahmanna siam a ni a, engkim peihfel a ni tawh a ni. Ruahman sa ang chuan Dubaiah Kg. 900 thawn a nih hnu hian Doha, Qatar leh Bahrainah Kg 740 ve ve pek chhin phawt tum a ni a. Sialhawk khua hian an Lakuihthei enkawlna ah Di hlo an hman loh thu leh Organic a nih thu a sawi bawk a ni.