Ni 2 awh Pa khawi dan zirhona zawhfel a ni

Govt. Serchhip College-a Department of Botany leh Food Myco Lab., Serchhip te buatsaih ni 2 awh 'Entrepreneurship and Skill Development Workshop On Mushroom Cultivation' chu Inrinni khan zawhfel niin Bawrhsap Nazuk Kumar IAS chuan a hmanpui a ni.
Food Myco Lab. Serchhip P&E Veng-a Pa khawi dan zirhona kharna hunah hian Bawrhsap chuan Pa khawi zirtute chu an nihlawh thu sawiin, Serchhip hmunah hetiang Laboratory remchang a awm chu lawmawm a tih thu a sawi a. Pa chu mihring tana chaw tha anih thu sawiin, Pa khawi dan zirtute chuan anmahni In leh hmun zimte ah pawh awlsam taka Pa khawi an kalpui theih dawn thu a sawi a, midangte pawh zirtir chawng zel turin a chah bawk.


He hun hi Govt. Serchhip College Principal K. Laldinpuii chuan kaihruaiin Serchhip DAO Tlangtimawia Zote pawhin Pa khawi dan zirtute chu an thil zir te a taka hmang chhunzawm zel turin a chah a. Tih tak takna, tumruhna leh mahni inthununna nei-a hma lam pan zel turin duhsakna hlanin Bawrhsap nen hian Training chhuak te hnenah Certificate an hlan a ni.

Tun tuma 'Entrepreneurship and Skill Development Workshop On Mushroom Cultivation' neih zawh takah hian Govt. Serchhip College Department of Botany atangin zirlai mi 40 an tel a, Henry Saingura Founder of Foods Myco Labs Mizoram, 2021 MSME Young Entrepreneur Success Stories Achiever chuan Pa khawi dan leh hralhchhuah tura sawngbawl dan te a zirtir a ni.

Comments

Popular posts from this blog

Tukverh-a tlasual boral