Sialhawk Lakhuihthei thawnchhuah leh a ni

Sialhawk khua in an tharchhuah Lakhuihthei (pineapple) kg 300 chu Dubai, United Arab Emirates (UAE) leh Bahrain-a hralh turin nimin zing khan thawnchhuah leh a ni.

Sialhawk Lakhuihthei hi Fair Exports (I) Pvt. Ltd. in an la leh dawn a, tun tumah hi chuan Thlawhna a phurh man zawng zawng hi Fair Exports te hian an tum vek bakah Mumbai-ah kg khat Rs. 30/- in an lei dawn a. Indawrna a kaltluan chuan ni 2/3 hnu velah Bahrain leh Doha-ah te thawn leh theih beisei a ni. Sialhawk khua-a Lakhuihthei chingtute hian kumin hian Lakhuihthei quintal 10,000 tharchhuah beiseiin tunah hian quintal 5000 vel an hralhchhuak tawh a, Mizoram chhung bakah Assam leh India rampawn ah te an thawnchhuak a ni. Sialhawk Pineapple Grower Society hian an Lakhuihthei hralhna tiawlsam turin APEDA (Agricultural and Processed Food Products Export Development Authority) kaltlangin Central Transport Subsidy an dil mek a, tun dinhmunah chhanna engmah an la dawng lo a ni.

Sialhawk VC Vice President J.Rampanmawia sawi danin, kan thenawm state Assam leh Tripura te chuan an thlai thar te ram danga thawnna tur thlawhtheihna phurh man hi Central sawrkarin APEDA kaltlangin a tumsak vek thin a. Chutiang anga Transport Subsidy an hmuh ve theih hunah chuan awlsam leh hlawk zawkin Sialhawk Lakhuihthei bakah Mizoram thlai thar dangte pawh ramdanga thawnchhuah theih a beiseiawm hle niin a sawi bawk.

Comments

Popular posts from this blog

Tukverh-a tlasual boral