SAI-ah National Sports Day, 2022 hman a ni

National Sports Day, 2022 chu nimin khan SAI Contact Sports Centre, Mission Vengthlang-ah hman niin he hun hi Sports Minister Robert Romawia Royte chuan a hmanpui a ni.

National Sports Day, 2022 puala inkhawm ah hian Sports Minister chuan Sports (infiamna) leh zirna chu a kalkawp a ngai tih sawiin, “National Education Policy, 2020 pawhin hei hi a ngai pawimawh em am a ni,” a ti a. Tunhma chuan Sports hi Co-Curricular Activity tih thin a nih thu leh tunah erawh chuan Curricular Activity zingah telh a nih tawh thu a sawi a. Lehkha thiam theih bakah taksa in fit leh hrisel neih a pawimawh tih sawiin, “Insawizawi leh taksa vawn uluk hi nitin nunphungah kan neih a pawimawh a, hei hi mipui nawlpui anga kan ti thei a nih phawt chuan kan taksa a lo in fit ang a, zirna kawngah leh eizawnna kawngah nasa lehzualin hma min sawn tir bawk ang a, Mizoram ang pawhin kan intodelhna atan taksa in fit kan neih hi a pawimawh takzet a ni,” a ti bawk.

Sports Minister chuan tunhnai kum 3 chhungin SYS Department hian infiamna ruhrel (sports infrastructure) tihchangtlunna atan cheng nuai 45,000 vel kan hmu tawh tih pawh sawiin, heng hmang hian kawng hrang hrangin hma an lak mup mup thu a sawi a, “COVID-19 hripui leng vangin kum 2 chhung duh angin hma kan la chak thei lova, kan dinhmun a ziaawm tak hnu hian theihtawp chhuahin tan kan la a ni,” a ti bawk.

National Sports Day hi kumtin August 29-ah India mi Hockey khel thiam hmingthang Major Dhyan Chand zahna lantir nan hman thin a ni a, nimin-a National Sports Day hmannaah hian Mizo Indigenous Games Association bultumin Mizo infiamna chu hrang hrang- Inkawibah leh Zawnga Lilawn dim dim (hmeichhe tan) bakah insuknawr leh khanchhuk atanga invuak thlak (mipa tan) hmanga inelna buatsaih a ni a, a pumpuia champion hnenah ‘Major Dhyan Chand Trophy’ hlan an ni.