HIV/AIDS dona kawngah inrawnkhawmna nei

HIV kai awlsam zawk tura ngaih te leh dinhmun hlauhawma ding mek te tana tanpuina (Harm Reduction programs) chak zawk leh nasa zawka kalpui dan tur sawihona leh inrawnkhawmna chu nimin khan Health Minister Dr. R. Lalthangliana hovin Assembly Annex Conference Hall-ah neih a ni.

He inrawnkhawmna ah hian HIV/AIDS dona kawnga thawktu Line Department zawng zawng te, Kohhran hruaitute, NGO te leh AIDS vei te enkawlna kawnga thawktute an tel a, Health Minister Dr. R. Lalthangliana chuan HIV/AIDS chu tanrualna nen hneh theih a ni tih sawiin, Hripui leng- COVID-19 dona kawnga Zoram mipui zawng zawngte kan tangrual ang khan natna hlauhawm tak min run mek tu, HIV/AIDS hi inlungrual tak leh beidawng duh miah lova kan do tlan chuan chhiatna liantham zawk kan pumpelh thei a ni,” a ti.

He sawihonna leh inrawnkhawmna ah te hian HIV chu enkawl theih nimahse, kai tawh chuan tihdamna awmlo a nih avangin a darh zel loh nana hmalak a pawimawh takzet thu te, kan ram a HIV darh nasat dan te, HIV hi nungchang kaihhawih natna a nih dan te, thalai HIV kai an pun zel chuan kan ram a nghawng chhiat nasat dan tur te zau taka sawiho a ni a. He natna avanga chhiatna thleng mek te leh harsatna lian zawk thleng theite veng tur chuan sawrkar Department hrang hrangte, tlawmngai pawl (YMA, MHIP, MUP, Zirlai pawl te, etc.,), Kohhran te tanrual leh tanho, inpuihtawn a ngaih zia te uar taka sawiho niin hmalak zel dan tur te rel ho a ni bawk.

He hun hi Esther Lal Ruatkimi, Principal Secretary, Health & Family Welfare Department chuan kaihruaiin thupui hrang hrang hmanga mithiam te thusawi ngaihthlak a ni a, Health & Family Welfare Board Vice Chairman Dr. ZR. Thiamsanga pawhin he hun hi a hmanpui a ni.

Comments

Popular News (Last 30 Days)

Serchhip DCSO sawn a ni