Latest News

Principal Secretary GAD in District Bawrhsap a kawm

Principal Secretary, General Administration Department (GAD) Navin Kumar Choudhury chuan Mizoram District hrang hrang 11-a Deputy Commissioner te chu biakhmuh theihna hmanga Meeting neihpuiin hetiang Meeting hi thlatin neih tum a ni.

Nimin-a Meeting-ah hian District Administration te hnathawh dan leh tun aia tha zawka mipui rawngbawl hna an kalpui theih dan kawng hrang hrangte Principal Secretary (GAD) hian a sawipui a, mipui te hnena inrelbawlna tha zawk a thlen theih nana DC te mawhphurhna leh hemi atana tul leh pawimawh nia a hriatte chu a sawilang a. Chung zingah chuan mipuite vuivaina aw leh an harsatna tawh te thuneitute hnena a thlen vat theih nan District-a Grievance Redressal Mechanism siam te, District mipuite mamawh chiang zawka DC ten an hriat theih nan District huamchhunga khua ah te zanriak-a khua tlawh te, an hnuaia District Officer hrang hrang te hnathawh vil te, Emergency Services leh tul pawimawh dangte entik lai pawha a that theih nan hengte vil te an ni a. District-ah hmasawnna hna hrang hrang thawh mek te chu enzui leh an thlen chin te a khat tawk a enpui te, District tinin an District Potential te hria a, chu chu engtin nge mipui tam zawkin an hlawkpui theih ang tih kawng dap te chu ngaipawimawh turin leh a taka kalpui turin DC te chu a chah a ni.

GAD Principal Secretary chuan DC hova hetiang Meeting hi thlatin Ningani tawp berah neih a nih tawh tur thu sawiin, heng Meeting-ah hian DC te hnathawh te bakah an harsatna te sawiho a ni dawn a, chu mai bakah Secretary hrang hrang te pawh heng Meeting-ah hian telin an Department chan theuha District hrang hranga hmalakna an neih mek leh ruahmanna an siamte DC te an sawipui thin anga, DC ten heng a harsatna an neih leh tawh te chu a Department changtu Secretary-ah an thlen thei ang, a ti a. A bultan nan nimin-a Meeting-ah hian Commissioner and Secretary, Health & Family Welfare Esther Lalrinkimi leh Secretary, School Education Department Dr. Lalzirmawia Chhangte te an tel a, Health & Family Welfare leh School Education Secretary te hian an Department chan hnuaia an ngaihpawimawh zual bik te chu District Bawrhsap te hi an hrilh bawk a ni.

Comments

Popular News (Last 30 Days)