Tun thla 31 khian Serchhip District-ah ‘Family Oriented SEDP’ tlangzarhna neih a ni dawn

Mizoram sawrkar Flagship Programme, SEDP hnuaia ‘Family Oriented SEDP’ chu State Level-a tlangzarh a nih hnuah Serchhip District-ah pawh tun thla ni 31 khian District Level-a tlangzarhna hun hman a ni dawn a, he hunah hian Village Level Committee te hnenah pawh an hnathawhna tur sum pekchhuah nghal a ni ang.

Mizoram Sawrkar Flagship Programme – Socio Economic Development Policy (SEDP) hnuaia chhungkua hmasawnna leh an eizawnna tinzawna eizawnna ngelghet an neihna tur, Family Oriented SEDP Serchhip District-a tlangzarh dan tur chungchang hi nimin khan Serchhip DC Meeting Hall-ah District Level Committee chuan Addl. DC Lalmuansanga Ralte hovin an ngaihtuah a, he Meeting hian Serchhip District-a SEDP tlangzarhna hun hi tun thla ni 31 hian Serchhip-ah neih nise tiin Hrangturzo bialtu MLA leh Home Minister Lalchamliana chu khuallian ni tura beisei a ni a, he hunah hian Line Department hrang hrang atanga SEDP dawng tura thlanchhuah mi pahnih theuh te hnenah Cheque hlan a ni anga, hemi rual hian Village Level Committee te hnenah SEDP an buaipuina kawnga an hman tur, Administrative Cost pawh hlan nghal a ni dawn a ni.

Tun tuma Family Oriented SEDP kalpui turah hian Assembly bial tin atangin mi 1500 zel thlanchhuah tura tih niin hemi ang hian Ser-chhip District-ah mi 4500 thlanchhuah tur a nih laiin mi 4499 thlanchhuah an ni a, hei hi Chekawn khua in mi pakhat an thlan kim loh vang nia hriat a ni a, Village Level Committee te hnenah hian beneficiaries pakhat zelah Rs. 300/- hisap in Administrative Cost hi pek a ni dawn a ni.

Serchhip District chhunga khua (Village) hrang hranga SEDP dawng tur zat hi a inang lo a, khaw mal-a tanpuina dawng tur tam berna chu North Vanlaiphai niin mi 271 thlan an ni a, Thenzawl East-ah mi 252 leh East Lungdar-ah mi 210 thlan an ni. Mi 100 leh 200 inkar thlanna khua 14 awmin mi 50 atanga 100 inkar thlanna khua 19 an awm a, mi 50 aia tlem thlanna khua 21 awmin tanpuina dawng tur tlemna ber Vanchengte-ah mi 8 in an dawng bawk ang.

Comments

Popular posts from this blog

Tukverh-a tlasual boral